Imbestigaren ti International Criminal Court (ICC) dagiti sanikua ken pinansial a rekursos ni dati a presidente Rodrigo Duterte tapno kitaenda no maikari met laeng daytoy a maikkan iti legal aid nga ididiaya ti ICC, segun iti pannakangiwat ti ICC a ni Fadi El Abdallah.
Iti maysa nga interbiu idi Marso 25, inlawlawag ni El Abdallah a dagiti laeng ukom ti ICC ti makaikeddeng no saan a kabaelan ti dati a presidente a bayadan dagiti abogadona, sakbay a maipaayan iti legal aid program ti ICC.
Itay nabiit, dinutokan ni Bise Presidente Sara Duterte ni Nicholas Kaufman a kas lead counsel, bayat a kitkitaenda ti posibilidad nga agkiddaw iti legal aid program ti ICC tapno adda pagbayadda kadagiti abogado ti amana, a mabalin nga aggatad iti minilion a pisos.
Kinuna ni El Abdallah a ti pakabuklan ti defense team ni Duterte ket maibatay iti panagdur-as ti kaso, iti bilang ti kaso, ken iti paset ti kaso (pre-trial wenno trial level).
19 nga OFW a nabalud iti Qatar, tultulongan ti gobierno ti Filipinas
Inlawlawag ni El Abdallah a ti nailanad iti arrest warant a 43 a kaso ti murder ket saan pay nga isu ti pinal a bilang ti maidatag a kaso, ta nausar laeng daytoy a kas sample case tapno maproseso ti arrest warrant, ket mabalin pay a manayonan daytoy.
Segun kadagiti report, mapapati nga umabot iti 30,000 dagiti napapatay kabayatan ti drug war nga inwayat ni Duterte. (Raymund Antonio/Manila Bulletin//Lito Hilidon/Bannawag)
