Dagiti personnel ti Mariano Marcos State University nga idauluan ni Presidente Virgilio Manzano Jr. (maikalima manipud iti kanawan) ken dagiti mannalon ti Pasuquin, Ilocos Norte, a mangipakpakita iti produktoda a puraw a sibuyas idi Marso 18, 2025. (Ladawan manipud MMSU)

Addan sigurado a paglakuan dagiti agmulmula iti sibuyas iti Pasuquin, Ilocos Norte para kadaguti produktoda babaen ti direkta a market link kadagiti institutional buyer.

Segun ken ni Wilfredo Valdez, cluster leader ken benepisiario ti kontrata a panagtalon nga itantandudo ti Department of Agriculture, naikumitdan ti mangibiahe iti aganay a 100 a tonelada a puraw a sibuyas iti Laguna agraman ti maysa a tonelada a buffer stock babaen ti contract growing agreement iti Jollibee Group Foundation (JGF) ken Mariano Marcos State University (MMSU).

Maibiahe inton Marso 28 ti umuna a batch ti produkto a buklen ti agarup walo a tonelada a puraw a sibuyas nga apit dagiti mannalon ti Pasuquin.

“Dakkel a pagyamananmi daytoy a programa gapu ta iti naglabas, saanmi a mailaklako dagiti oversized a sibuyasmi. Ired-reject dagiti negosiante gapu iti kadadakkel dagitoy. Saan itan ta sertipikadokamin iti GAP (Good Agriculture Practices) ken addan direct market-mi,” kinuna ni Valdez.

Lokal

Urijah Publishing Enterprises, yalnagna ti libro ni Juan Ben Quimba iti Dap-ayan 2025 ti GUMIL Filipinas

Ti katulagan ti kontrata, nga addaan panggep a tumulong a mang-stabilize iti presio dagiti produkto ti agrikultura, ket pinirmaan idi Marso 18, 2025 da MMSU President Virgilio Julius Manzano, Jr., Pasuquin Mayor Robert Aguinaldo, OIC Provincial Agriculturist Maria Teresa Bacnat, Ayat ti Pasuquin Farmers Irrigators Association President Norman Bulosan, ken dagiti JGF farmer-operator.

Paset ti katulagan ti pannakaikaligum a suroten dagiti mannalon dagiti mairekomendar nga intervention manipud kadagiti eksperto iti agrikultura ti MMSU tapno mapasayaat ti produktibidad, ma-optimize ti pannakausar dagiti rekurso, ken masigurado ti nalablabon nga apit para itoy a panagaapit.

Kinuna ni Valdez a ti programa ti nangtignay kadakuada a mangadaptar kadagiti moderno a teknik ken tumulong a mangitandudo kadagiti best practices iti agrikultura kadagiti mannalon.

Iti maysa nga statement, binigbig ni Manzano ti napateg nga akem dagiti mannalon ken ti natibker a pannakitinnulong kadagiti institutional buyer tapno maparang-ay ti agrikultura. (Leilanie Adriano/PNA)