Naala manen ni Park Bo-gum, a nabayagen a pagaammo gapu iti kinaagtutubo a pangawisna, ti magusgustuan dagiti agbuybuya kenkuana iti panangakemna iti biag ti maysa a naulimek ngem napinget nga ama iti drama ti Netflix a “When Life Gives You Tangerines.”
Akmen ti 31-anios nga aktor ti naub-ubing a bersion ni Yang Gwan-sik, maysa a natibker ken natalek nga asawa ken ama nga agtalinaed a napeklan a mangay-ayat iti asawana a ni Ae-soon (nga inakem ni IU) ken kadagiti annakda bayat ti panagdaliasatda iti rigat ken pannakapukaw.
Nupay saan a matagtagari ken natakneng ti panagsasao ti karakterna, nakalamlamuyot ti panangipaay ni Park iti nauneg nga emosion babaen ti natanang nga ebkas ken kontrolado a panagtignay, a mamaglua kadagiti agbuybuya iti amin nga edad ken henerasion.
Nangrugi a na-stream idi Marso 7, nagtalinaed a No. 1 ti “When Life Gives You Tangerines” iti popularity chart ti Netflix Korea ken ngimmato iti No. 2 iti sangalubongan iti non-English TV category. Mairuruar dagiti episode-na iti set ti uppat nga episodes kada lawas, a dagiti maudi nga episode ket mairuar inton Marso 28.
Myanmar, Thailand, nadayyeg iti 7.7 a ginggined
Ti “When Life Gives You Tangerines” ti umuna a proyekto ni Park sipud pannakompletona iti serbisiona iti militar idi 2022. Nagustuanna unay iti akmenna isu nga intantanna payen ti sabali a drama a pagparanganna tapno alaenna ti akem ni Gwan-sik.
Kas Gwan-sik, iladawan ni Park ti espiritu ti lalaki a manmano nga agsao ngem yebkasna ti ayat babaen ti panagtignay. Aglaklako isuna iti nateng iti tiendaan kas kasukat ti managbabain nga asawana, ken itedna kadagiti annakna ti kasayaatan a paset ti taraon iti tunggal pannangan (kas iti gisantes a laok iti innapuy), ken pulos nga uray naminsan la koma, saan a nagreklamo iti kinarigat a panagbiagna kas mangngalap.
Inladawan ni Park ni Gwan-sik kas maysa a tao a siuulimek a mangsalaknib ken mangipatpateg kadagiti ay-ayatenna. “Tunggal maysa ket addaan puso a mangipateg ken mangaywan kadagiti kapamiliana, kas ken ni Gwan-sik,” kinuna ni Park. “Saanda la a kanayon nga iparangarang dayta. Mamatiak nga adda dagiti tattao iti lubong a kas ken ni Gwan-sik.”
Gapu ta agbibiag ni Gwan-sik a napalikmutan kadagiti tattao nga ay-ayatenna, kinuna ni Park a dina pulos nakita ti karakter a kas nakapimpiman. “Pampanunotek a kanayon a naan-anay a sipupuno ti lebel ti kinaragsak ni Gwan-sik,” kinunana. “Intedna ti aminna tapno maaramid ti pamiliana ti kayatda nga aramiden. Saan a nakalkaldaang dayta para kaniak. Pakaidayawan dayta.”
Ngem marba uray ti katibkeran a lalaki, napasaran dayta ni Gwan-sik idi mapukawna ti tallo ti tawenna nga anakna a lalaki. Kinuna ni Park a narigatan no kasano nga iparangna ti kasdi a ladingit. “Adda linia iti iskrip a mabasa ti kastoy: ‘Ti ikkis ti ama, dayyegenna ti daga.’ Nariknak a ti kapupudnuan a wagas a pangipakita iti kasdi a panagladingit ket ti simple a pannakadalupona a siuulimek. Ninamnamak a dayta a kanito ket mabalin a mangyeg iti liwliwa iti maysa a tao.”
Ti sabali pay nga eksena a nakaawis iti atension dagiti agbuybuya ket ti panaglangoy ni Gwan-sik manipud iti bapor nga agsubli iti pantalan tapno makadanon ken ni Ae-soon. Ni Park, a dati a competitive swimmer agingga iti middle school, ti nangaramid a mismo iti eksena.
“Daydiay ti damo a panaglangoyko iti baybay, subsubaaennak ti agus nga iwalin ti sikigak,” kinunana. “Ngem napanunotko, ‘Kaano pay a maaddaanak iti gundaway a kas iti daytoy?’ ket isu nga inaramidko daydiay.”
Tapno agbiag a kas Gwan-sik, nangiwayat met ni Park kadagiti pisikal a panagbalbaliw tapno maibagay iti akem. “Gapu ta lumalangoy ti karakter, dimmagsen ti timbangko. Timmulong ti makeup team tapno agbalin a kasla kinesset ti init ti kudilko. Ket gapu ta saan unay nga agsasao ni Gwan-sik, imbabak ti timekko para iti akemko.”
Nupay taga-Isla ti Jeju ni Gwan-sik, manmano nga agsao daytoy iti dialekto a Jeju. “Imbaga kaniak ti direktor a taga-Jeju ti ama ni Gwan-sik, ngem naggapu iti sabali a rehion ni nanangna. Isu nga inkagumaak a pinagtipon ti sangkabassit a dialekto ti Jeju iti ritmo ti panagsao ni nanangna," inlawlawag ni Park.
Iti pannakipagtrabahona ken ni IU, ti kaduana nga aktres a nangakem ken ni Ae-soon, kinuna ni Park a “manmano a gundaway ti agakem a kaduam ti kaedadmo, naragsakanak unay a nakipagtrabaho kenkuana. Iti pannakakitak kenkuana a lumasat iti tunggal emosional a parang a kas Ae-soon, sa akmenna met laeng ti bukodna nga anak a babai a ni Geum-myung, panagkunak ket 'addaan isuna iti di nakapapati nga emosional a kinaandur.' Kayatko nga ibaga nga ibaga kenkuana: ‘Pudno la unay nga intedmo ti aminmo iti daytoy a proyekto.’”
Kadagiti maud-udi nga episode, kinuna ni Park a "kalpasan a mabuyada ti paggibusanna, panagkunak ket marikna dagiti tattao ti tarigagay a yebkasda iti ayatda nga ad-adda a siwayawaya kadagiti ipatpategda. Inanamaek nga agtalinaed daytoy a drama iti kaunggan ti pusoda iti napaut a panawen."
Nupay ad-adda nga am-ammo a kas aktor, orihinal nga arapaap ni Park ti agbalin a singer-songwriter. Immuna a nangisubmitir kadagiti video ti bagbagina nga agkankanta ken agtoktokar iti piano kadagiti entertainment agency ngem inallukoyda a padasenna ti acting.
Damo a nagparang idi 2011 babaen ti pelikula a “Blind” ket nagbalin a nalatak iti akemna a kas Choi Taek, maysa a genius go player, iti nalatak a drama a “Reply 1988.” (The Korea Times/Manila Bulletin Entertainment/RVA)
