Dumalan iti neuropsychiatric exam ti maysa a police officer a naidarum iti agduduma a kaso gapu kadagiti paskilna iti social media a mainaig iti kaso ti International Criminal Court (ICC) kontra ken ni dati a presidente Rodrigo Duterte, segun iti Philippine National Police (PNP).
Iti maysa a virtual press conference idi Marso 25, kinuna ti spokesperson ti PNP a ni Brig. Gen. Jean Fajardo a naidarum ni Patrolman Francis Steve Fontillas kadagiti kaso nga administratibo a pakairamanan ti grave misconduct ken conduct unrecoming of a police officer, malaksid iti kriminal a kaso para iti inciting to sedition a naipila iti Quezon City Prosecutor’s Office.
“Magsasailalim siya sa neuropsychiatric examination para i-check din iti i-eksamine kung ano ba yung kanyang kasalukuyang mental status,” kinuna ni Fajardo.
Agpaspaskil ni Fontillas iti social media kadagiti panangipangta kontra iti gobierno, International Criminal Police Organization (Interpol), ken iti ICC kalpasan ti pannakaarestar ni Duterte idi Marso 11.
19 nga OFW a nabalud iti Qatar, tultulongan ti gobierno ti Filipinas
Malaksid kadagiti kontrobersial a sasaona iti online, kinuna ni Fajardo a nag-absent without official leave (AWOL) ti polis manipud Marso 6 agingga 19.
Nag-report iti duty-na iti Quezon City Police District (QCPD) ni Fontillas idi Marso 20 ken naipasidong iti restrictive custody.
Segun iti PNP, addaan iti pakasaritaan ti makariribuk a kababalin ti nasao a polis, a pakairamanan ti kalakana nga agpungtot ken panagbaliwbaliw ti riknana, ken nagdalanen iti medikasion idi 2023.
“Hahayaan muna natin yung evaluation at assessment na gagawin ng PNP Health Service to determine kung ito bang police na ito ay mentally fit pa to continue his police service,” kinuna ni Fajardo. (Christopher Lloyd Caliwan/PNA)
