Patien ni Senate President Francis "Chiz" Escudero a saan a nalabsing ti soberania ti Filipinas iti pannakaarestar ni dati a presidente Rodrigo Duterte.
Iti maysa nga interbiu ita a Martes, Marso 26, inlawlawag ni Escudero a saan a naikompromiso ti soberania ti pagilian gapu ta Filipino dagiti nangidatag iti kaso iti ICC, ket saan a ganggannaet. Maikadua, Filipino ti nangyawat kenkuana, ket awan ti ganggannaet a nakibiang iti pannakaarestarna.
Segun ken ni Escudero, awan met ti naka-pending a kaso ni Duterte a kaipapananna, naikkaten ti hurisdiksion dagiti Filipino nga ukom isu a naipanen iti ganggannaet a pangukoman.
Indilig ni Escudero iti kaso ni dati a diputado ti Negros Oriental Arnolfo "Arnie" Teves Jr. nga addan kasona iti Filipinas.
19 nga OFW a nabalud iti Qatar, tultulongan ti gobierno ti Filipinas
Ngem iti biang ni Duterte, awan ti kaso a naipila a maibusor kenkuana, ket ti ICC ti nagkamangan dagiti biktima nga agsapul iti hustisia.
Innayon ni Escudero a mayannatup iti linteg ti pannakaarestar ni Duterte, a nadakamat iti hearing iti Senado nga insayangkat ni Senador Imee Marcos, nga uray asino a tao, mabalin a maidatag iti ICC mainaig iti kaso a crimes against humanity.
Ti Republic Act (RA) 9851 wenno ti "Philippine Act on Crimes Against International Humanitarian Law, Genocide and Other Crimes Against Humanity" ti linteg a dakdakamaten ni Escudero. (Dhel Nazario/Manila Bulletin//Lito Hilidon/Bannawag)
