Impakaammo ni Senador Imee Marcos ita nga aldaw, Marso 26, ti isisinana iti Alyansa para sa Bagong Pilipinas ta saanna a kayat ti plataporma dagiti kandidato ti Alyansa ket kayatna ti agtalinaed a kas "independent" a kandidato.
Iti isisinana iti Alyansa, kinuna ni Marcos nga adda ilemlemmeng ti gobierno iti panangdakamatda iti executive privilege ken sub judice rule iti naangay a hearing ti Senado iti pannakaarestar ni dati a presidente Rodrigo Duterte idi napan a lawas.
Kinuna ni Marcos nga iti laksid ti kanayon a panangibagbaga ti gobierno a tungtungpalen laeng ti Filipinas ti internasional a pagrebbenganna, maysa laeng daytoy a panangabbong iti kinapudno ken mangpataud iti ad-adda a panagduadua a saan a naikankano ti Konstitusion ken natagibassit ti soberania ti Filipinas iti pannaakarestar ni Duterte.
Itay kallabes, insayangkat ni Marcos ti maysa a hearing, kas daulo ti Committee on Foreign Relations ti Senado, a nagimbestigar iti maipagarup a panangipalubos ni Presidente Ferdinand Marcos Jr., a kabsat a mismo ti senadora, a maarestar ni Duterte iti International Criminal Court (ICC) ken mabista iti kasona a crimes against humanity. (Dhel Nazario/Manila Bulletin//Lito Hilidon/Bannawag)
