Agdagup iti 206 a Filipino a biktima ti human trafficking ti nakasublin iti Filipinas itoy a lawas kalpasan pannakaispalda manipud iti scam hubs iti Myanmar, impakaammo ti Inter-Agency Council Against Trafficking (IACAT) idi Marso 26.
Segun iti IACAT, simmangpeten dagiti biktima iti Ninoy Aquino International Airport (NAIA) Terminal 1 idi Marso 25 ken 26, a sinabet ti nadumaduma nga ahensia ti gobierno kas iti Department of Foreign Affairs (DFA), Bureau of Immigration (BI), Department of Migrant Workers (DMW), Department of Health (DOH), Department of Social Welfare and Development (DSWD), ken ti Overseas Workers Welfare Administration (OWWA).
Kinuna ni sekretario ti Department of Justice (DOJ) Jesus Crispin C. Remulla, daulo ti IACAT, a rugrugi pay laeng daytoy a pannakaispal dagiti 206 a Filipino, ket agtalinaed ti karida a tulonganda pay dagiti biktima a makaallangon.
Itultuloy ti DOJ ti panagimbestigarda tapno madusa dagiti illegal recruiter a mangal-allilaw kadagiti Filipino nga agtrabaho iti ganggannaet a pagilian. Rinugian metten ti BI ti pannakasuspenso ti pito nga immigration officer a nairaman iti iruruar dagiti biktima a mapan iti Myanmar.
19 nga OFW a nabalud iti Qatar, tultulongan ti gobierno ti Filipinas
Binallaagan ni Remulla ti publiko a saanda koma a paallilaw kadagiti maididiaya a trabaho iti ballasiw-taaw, nangruna no saanda nga agdalan iti legal exit wenno addaan iti mapagduaduaan a travel arrangement. (Jeffrey Damicog/Manila Bulletin//Lito Hilidon/Bannawag)
