Kasango ni Alex Eala ti Filipinas ni Jessica Pegula ti U.S. iti Miami Open kalpasan ti panangibalat ni Pegula iti kalabanna a ni 2021 US Open Champion Emma Raducano, maysa a British player.
Tubo ti Quezon City ni Alex (Alexandra Maniego Eala); naipasngay idi Mayo 23, 2005. Iti agdama, No. 140 ti ranggona iti WTA (No. 74 iti live ranking), kangatuan a nagun-od ti maysa a babai a Filipino tennis player. Inyalat ni Eala ti kaunaan a junior singles title-na iti 2022 US Open, a namagbalin kenkuana nga umuna a Filipino player a mangabak iti junior Grand Slam singles title.
Maysa met laeng nga atleta ti ina ni Alex, ni Rosemarie "Rizza" Maniego-Eala, 1985 Southeast Asian Games bronze medalist iti 100-meter backstroke ken retirado a chief financial officer ti Globe Telecom. Kaanakan ni Philippine Sports Commission chairperson ken dati a Philippine Basketball Association commissioner Noli Eala. Nagay-ayam met ti kabsatna a lalaki, ni Michael (Miko), iti tennis para iti Pennsylvania State University Nittany Lions (2020-2024). Estudiante iti Rafa Nadal Academy iti Manacor (Mallorca, Spain), sipud pay idi agtawen iti 12.
Nayanak met ni Jessica Pegula idi Pebrero 24, 1994 iti Bufallo, New York. Dagiti nagannak kenkuana: Terry (maysa a natural gas tycoon ken professional sports investor) ken Kim.
Japan, 'napateg a kadua' iti panangsaranget iti China
Nangrugi a timmayok ti bituen ni Jessica iti tennis idi nangabak kaduana ni American tennis player Taylor Townsend) iti US Open doubles tournament idi Agosto 30, 2011. Nupay saan pay a kualipikado, naawis para iti qualifying draw iti Indian Wells idi March 2012 a nangipakitaanna iti siglatna. Iti panagbalinna a qualifier, naikkan iti gundaway a makisalip iti 2015 US Open a nangibalatanna kada Melanie Oudin, Margarita Gasparyan, ken Shuko Aoyama. Iti main draw, inabakna ni Alison Van Uytvanck iti first round ngem inatiw kalpasanna ni Dominika Cibulkova.
Nagun-odna ti umuna a titulona iti WTA singles idi Agosto 4, 2019, iti Citi Open iti panangibalatna ken ni Camila Giorgi. Iti tawen 2020, inatiwna ni CiCi Bellis iti umuna a round.
Mairaman pay kadagiti inatiwna a nalalaing a tennis player da Alize Cornet ti France, Tamara Zidanšek ti Slovenia, ken Danish tennis player Caroline Wozniacki. Daytoy ti namagtugmok iti dalanda ken Serena Williams a nakaabakanna iti 3-6 4-6.
Iti agdama, ni Pegula ti maika-4 (Rank 4) a kalaingan a babai a tennis player iti sangalubongan.
