Agpannuray iti pangngeddeng ti gobierno ti Filipinas ti pannakaipaay ti interim release ken ti temporario a pannakaisubli ni dati a presidente Rodrigo Duterte iti Filipinas manipud iti The Hague, segun ken ni pannakangiwat ti International Criminal Court (ICC) Fadi El Abdallah.
Kinuna ni El Abdallah a masapul nga awaten ti gobierno ti Filipinas dagiti teknikal a wagas ken kondision sakbay nga agdesision dagiti hues ti ICC no patganda wenno saan ti kiddaw ni Duterte nga interim release.
Nupay awan pay opisial a waragawag manipud iti kampo ni Duterte no nagkiddawdan iti interim release, imbaga ti abogadona a ni Nicholas Kaufman nga agkiddawda iti interim release iti umisu a panawen.
Kinuna ni El Abdallah a mabalin a kiddawen ti interim release no adda mabukel a wagas ken kondision tapno masigurado a no bilang temporario a mawayawawayaan ti maysa a tao, maisubli met laeng daytoy iti korte apaman nga ibilin dagiti hues.
19 nga OFW a nabalud iti Qatar, tultulongan ti gobierno ti Filipinas
Inlawlawag ni El Abdallah a masapul a pagsasaritaan dagiti maseknan a partido dagiti wagas ken kondision sakbay nga agdesision dagiti hues no patganda wenno saan ti interim release.
Innayon ni El Abdallah a mabalin nga agpili ni Duterte iti sabali a pagilian, a saan a ti Filipinas, a pagyananna bayat ti temporario a pannakawayawayana, ngem masapul nga umannurot dayta a pagilian kadagiti wagas ken kondision ti interim release.
Maaramid ti confirmation of charges hearing ni Duterte iti ICC inton Septiembre 23. (Raymund Antonio/Manila Bulletin//Lito Hilidon/Bannawag)
