Agtultuloy ti naisangsangayan a gapuanan ni Alex Eala iti 2025 Miami Open babaen ti panangatiwna iti lima-daras a Grand Slam champion ken Numero 2 iti sangalubongan iti tay-ak ti tennis a ni Iga Swiatek ti Poland babaen ti iskor a 6-2 ken 7-5, itoy Mierkoles, Marso 27, 2025. Babaen daytoy, nakastreken daytoy 19-anios a Filipina iti semifinals ti nasao a torneo.
Nairaman ni Eala iti Women’s Tennis Association (WTA1000) a torneo kas wildcard. Ni met Swiatek ti maikatlo a Grand Slam champion nga inatiwna. Immuna nga inatiwna da 2017 French Open titlist Jelena Ostapenko iti maikadua a rikus, ken ti agdama a kampeon ti Australian Open a ni Madison Keys iti maikatlo a rikus.
Kaso a pammapatay, naipila kontra iti suspek iti panagpadalis iti Vancouver street festival a nakatayan ti 11
Babaen pay daytoy a panangatiwna, ni Eala ti kaunaan a Filipina a makagteng iti WTA1000 semifinal.
Kuna ni Eala a saan a makapamati iti panangabakna ket napalalo ti ragsakna.
Sakbay ti Miami Open, adda ni Eala iti maika-140 a ranggo. Kalpasan ti panangatiwna ken ni Swiatek, manamnama a saanen a nababbaba ngem maika-75 ti ranggona.
Kasango ni Eala iti semifinals ti mangabak iti laban da 2021 US Open champion Emma Raducanu ken maika-4 iti sangalubongan a ni Jessica Pegula. (AST)
