Sumarungkar ti bapor ti Philippine Coast Guard (PCG) a BRP Gabriela Silang (OPV-8301) iti tallo a pagilian a kameng ti Association of Southeast Asian Nations (ASEAN) para iti tallo nga aldaw a port visit.
Indauluan ni Admiral Ronnie Gil Gavan, PCG commandant, ti panangparubuat iti 83-metro a bapor iti South Harbor iti Manila idi Marso 27 a mapan iti Thailand, Malaysia, ken Vietnam.
Maitunos ti mision, nga agingga iti Abril 20, iti pannakiuman ti Filipinas iti rehion, nangruna ta ti Thailand Maritime Enforcement Coordinating Center (Thai-MECC) ti agakem a kas daulo ken mangpasangaili iti ASEAN Coast Guard Forum (ACF) iti 2025, tapno mapatibker ti panagkumit dagiti pagilian a kameng ti ASEAN iti maritime cooperation iti rehion.
Impaganetget ni Gavan a napateg ti akem ti Malaysian Maritime Enforcement Agency (MMEA) iti panangitandudo iti panagtitinnulong dagiti pagilian iti rehion.
19 a Filipino a nakemmeg iti Qatar, adda pay laeng iti sidong ti polis
Innayon ni Gavan a naisayangkat ti port visit iti Vietnam gapu iti napirmaan a memorandum of understanding (MoU) iti maritime cooperation iti nagbaetan ti PCG ken Vietnam Coast Guard idi Enero ti napan a tawen. (Martin Sadongdong/Manila Bulletin//Lito Hilidon/Bannawag)
