Indauluan ni House Deputy Speaker Camille Villar ti pannakalukat ti 12 a kadsaaran a baro a pasdek ti Las Piñas General Hospital and Satellite Trauma Center (LPGHSTC) kas paset ti ilunglungalongna a pannakagun-od iti pannakataripato ti salun-at.
Iti pannakaikalawa ti ospital, nanayonan ti kapasidad daytoy iti agingga iti 500 a kama ket naipasigurado nga ad-adu a Filipino ti maserbianna.
Naaramid ti pannakapasayaat ti ospital babaen ti Republic Act No. 11497 nga impila ken inkampania ni Villar iti Kongreso. Saan laeng a pinalawa ti linteg ti ospital no di pay ket pinatibker ken indur-asna pay ti serbisiona babaen ti panangpaaduna kadagiti propesional nga agserbi ditoy pakairamanan dagiti doktor, nars, ken support staff.
“Napateg unay a maaddaantayo kadagiti ospital a kompleto kadagiti kasapulan ken alikamen a sindadaan nga usaren dagiti kailiantayo,” inulit-ulit ni Villar. “Nangnangruna kadagiti kailian ken komunidad a saan unay a matamtaming ken maserserbian.”
16 nga OFW a nagrali iti Qatar, mabalin a maibalud iti 3 a tawen
Impaganetgetna nga adda pagrebbengan ti gobierno a mangipaay iti de kalidad a serbisio iti salun-at iti tunggal pamilia a Filipino. “Responsibilidad ti gobierno ti mangipatungpal kadagiti dekalidad a programa ti salun-at a mangsungbat ken mangipasigurado iti salun-at ti tunggal pamilia a Filipino,” kinunana.
Gapu iti dayta, inyebkas ni LPGHSTC Medical Director Dr. Ignacia Guia Fajardo ti napalaus a panagyaman ken panangdayawna iti liderato ni Villar, ken binigbigna ti awan kaaspingna a panangikomit ni Villar iti bagina a mangpaadda ken mangipasigurado iti kasapulan a pondo para iti pannakailawa ti ospital. Binigbigna pay ti anep ken tulong ti ina ken kabsat ni Villar—da Senador Cynthia ken Senador Mark Villar— iti daytoy a gannuat.
Nabayagen a kampeon ni Villar, nga agngayangay a papili a senador, kadagiti social programs a mangtaming kadagiti kasapulan ni ordinario a Filipino. Inkarina nga idanonna iti Senado dagiti baro a panirigan, a mangipamaysa kadagiti kabaruanan a pagalagadan a mangpasayaat iti panangtaripato iti salun-at, edukasion, housing, karbengan dagiti babbai, ken gundaway nga agnegosio.
Ti pannakapalawa ti LPGHSTC, iparangarang ti dedikasion ni Villar iti serbisio publiko, ken mangpatibker iti adbokasiana para iti nasaysayaat a pannakataripato ti salun-at ken iti karina a mangaramid kadagiti manayon ti epekto iti biag ti pamilia ni Filipino.
