Adda itan iti babaen ti linteg ti Commission on Elections (Comelec) dagiti lokal a kandidato, ta mangrugi ti panawen ti kampania para iti lokal a kandidato ita nga aldaw, Marso 28.
Imbalakad ni daulo ti Comelec George Garcia idi kalman, Marso 27, kadagiti kandidato iti lokal a saanda koma nga agsuksukir, no di ket agtulnogda iti pagannurotan ti Comelec.
Segun iti Resolution 11086 ti Comelec, mabalin nga usaren dagiti kandidato ti election propaganda kas iti anunsio iti TV wenno cable TV, radio, pagiwarnak, iti internet wenno iti ania man a wagas, outdoor static ken LED (light-emitting diode) a billboard, agraman ti mobile wenno transit advertisement, kas maitunos iti limitasion nga inkeddeng ti Comelec iti panaggastos dagiti kandidato ken partido, panangsalimetmet iti kinapudno iti panaganunsio, ken iti panangimaton ken regulasion ti Comelec.
Impalagip ni Garcia kadagiti kandidato nga iplastarda dagiti election material kadagiti common poster area, surotenda ti standard a kadakkel ti poster, ken ikkatenda ti poster no adda maawatda a notice manipud iti Comelec.
19 nga OFW a nabalud iti Qatar, tultulongan ti gobierno ti Filipinas
Maiparit iti panawen ti kampania ti panangted iti taraon, panangted iti nabalor a banag, kangrunaan ti kuarta.
Pinakdaaran ti Comelec dagiti kandidato a siguraduenda a ti iwarasda a pinansial a tulong ket masapul nga adda pammalubos ti Comelec, ta no awan, maibilang daytoy a vote buying wenno panangabuso iti rekursos ti estado.
Kinuna ni Garcia a di bumurong a madiskualipikar ti asino man a mapaneknekan a mangaramid iti daytoy.
Agpaut ti panawen ti kampania agingga inton Mayo 10 (Sabado), malaksid inton Abril 17 (Huebes Santo) ken 18 (Biernes Santo). (Dhel Nazario/Manila Bulletin//Lito Hilidon/Bannawag)
