Ipapaay ti gobierno ti Filipinas, babaen ti Department of Migrant Workers (DMW), ti kasapulan a tulong kadagiti 19 nga Overseas Filipino Workers (OFWs) a naarestar iti Qatar gapu iti mapapati a panangisayangkatda iti rali idi Marso 28.
Kinuna ni Sekretario ti DMW Hans Leo Cacdac a binaondan ti maysa a labor attache iti estasion ti polis a nakaibaludan dagiti OFW gapu iti kaso nga illegal assembly ta nagralida nga awan ti pammalubos ti Qatar.
Saan nga impalnaad ti DMW ken ti Department of Foreign Affairs (DFA) no adda pakainaigan ti panagrali dagiti natiliw nga OFW iti pannakaibalud iti The Netherlands ni dati a presidente Rodrigo Duterte. Kasangay ni Duterte idi Marso 28.
Pinalagipan ni Cacdac dagiti OFW a liklikanda ti agaramid iti ania man a maikaniwas iti paglintegan ti yanda a pagilian, idinto nga addada idiay tapno agtrabaho.
16 nga OFW a nagrali iti Qatar, mabalin a maibalud iti 3 a tawen
Segun iti DFA, idi pay Marso 13 a nangiruar ti Embahada ti Filipinas iti pakdaar kadagiti OFW a raemenda ti paglintegan ken kannawidan ti Qatar mainaig iti panagrali ken panangipeksa iti politikal a riknada. (Aaron Recuenco/Manila Bulletin//Lito Hilidon/Bannawag)
