Dinayyeg ti napigsa a ginggined ti Myanmar ken ti kabangibangna a Thailand idi Biernes, Marso 28, a nangrugpo kadagiti pasdek, rangtay, ken maysa a dam. Di nababbaba ngem 144 a katao ti natay iti Myanmar, idinto a walo ti natay gapu iti narsuod a maipatpatakder pay laeng a pasdek iti Bangkok.
Mapan a 7.7 ti magnitude ti ginggined nga adda iti asideg ti Mandalay, Myanmar ti epicenter-na, sa sinaruno ti 6.4 a magnitude nga aftershock.
Saan pay a nalawag ti bilang dagiti natay, nadangran ken nadadael, nangruna iti Myanmar, a maysa kadagiti kapanglawan a pagilian iti lubong. Agsagsagaba ti pagilian iti civil war, ken nainget ti pannakairuar ti impormasion wenno damag.
Ngem segun iti gobierno militar ti Myanmar, saan a bumaba iti 144 ti bilang dagiti natay ken 730 ti nadangran.
Japan, 'napateg a kadua' iti panangsaranget iti China
Iti Bangkok, tallo ti natay iti narba a pasdek ken 90 ti mapukpukaw, segun ken ni Defense Minister Phumtham Wechayachai.
Indeklarar ti Bangkok City Hall a kas disaster area ti siudad tapno mapapardas ti panagresponde. Nasurok a 17 a milion ti populasion ti Bangkok, ket kaaduan kadakuada ti agindeg iti natatayag nga apartment.
Narikna ti ginggined agingga iti Yunnan ken Sichuan a probinsia ti China a nakadadaelan dagiti balay ken nangapektar pay iti Siudad ti Ruili a nagbedngan ti Myanmar ken China.
Iti pannakaisursurat daytoy a damag, awan pay ti naireport a naapektaran a Filipino iti Thailand, segun iti Embahada ti Filipinas iti Bangkok.
Binalakadan ti embahada ti 32,950 a Filipino iti Thailand nga agridamda, ken agpannurayda kadagiti mapagtalkan a pagtaudan ti impormasion.
Para iti emergency, mabalin nga awagan ti Embahada ti Filipinas iti Yangon babaen ti numero ti Assistance-to-Nationals (ATN): +959985210991 wenno iti opisial a Facebook Messenger ti Philippine Embassy iti Myanmar.
Mabalin a kontaken ti Philippine Embassy iti Bangkok babaen ti ATN +6681 9897116 wenno babaen ti email: [email protected].
