Kidkiddawen ni Senador Mark Villar ti pannakapadur-as ti ad-adu pay nga espasio a nairanta a para kadagiti ubbing iti entero a Filipinas, nga ipagpaganetgetna ti kinapateg ti natalged, inklusibo, ken nawaya nga aglawlaw nga agsursuruan, pagay-ayaman, ken tumanoran dagiti ubbing.
“Kabayatan ti panangilawatayo kadagiti siudad ken komunidadtayo, masapul a siguraduentayo nga addaan dagiti ubbing kadagiti natalged nga espasio a pangsukisokan ken pangtagiragsakanda iti panagubingda,” kinuna ni Villar. “Ti panagpuonan iti impraestruktura a natalged ken makaay-ayo para kadagiti ubbing, panagpuonan met laeng para iti masakbayan ti pagiliantayo.”
Gapu iti napardas nga urbanisasion, adu a sangakaarrubaan ti awanan kadagiti nairanta a lugar a pagay-ayaman, parke, ken espasio a paglinglingayan. Masansan nga adda dagiti eskuelaan ken publiko a lugar iti asideg dagiti kalsada a pagdudupudopan ti trapiko, nga isu a mangpangato iti peggad ti pannakaaksidente. Ipamatmat dagiti panagsukisok a ti pannakaakses kadagiti natalged nga aglawlaw a pagay-ayaman ket addaan iti napateg nga akem iti pisikal, emosional, ken kognitibo nga itatanor ti ubing.
Idardarirag ni Senador Villar dagiti polisia a mangikalikagum kadagiti lokal a gobierno ken city planners a mangitiponda kadagiti child-friendly space kadagiti plano ti panagdur-as. Mairaman iti singasingna ti panangpalawa kadagiti parke ken pagay-ayaman, panangyam-ammo kadagiti pedestrian-friendly zone, ken panangpataud kadagiti sentro ti pagsursuruan ti komunidad a mangipaay kadagiti natalged ken makapadur-as nga aktibidad para kadagiti ubbing.
16 nga OFW a nagrali iti Qatar, mabalin a maibalud iti 3 a tawen
“Rumbeng a madisenio dagiti urban space-tayo a mairaman ti pakaseknan dagiti pamilia. Masapul a maipangpangruna dagiti pagay-ayaman, parke, ken recreational center, saan ket a matrato a kas nalagip la maisengngat,” impaganetget ni Villar.
Kas dati a secretario ti Department Public Works and Highways (DPWH), indauluan ni Villar dagiti dadakkel a proyekto ti impraestruktura a nangpasayaat iti connectivity ken mobility. Ita, kas senador, itantandudona dagiti pagalagadan a mangipasigurado a dagiti siudad ket nadisenio saan laeng a para kadagiti lugan ken negosio no di ket para kadagiti ubbing ken kadagiti pamilia. Mairaman ditoy ti pannakaipatungpal dagiti natalged a ruta nga agturong kadagiti pagadalan, pedestrian walkways, ken naing-inget a pagannurotan ti trapiko kadagiti lugar a masansan a papanan dagiti ubbing.
Kalikaguman pay ni Villar ti panagtitinnulong ti gobierno, pribado a sektor, ken non-profit organizations tapno maponduan ken mataginayon dagiti child-friendly public spaces. “Babaen ti panagtitinnulong, makaibangontayo kadagiti komunidad a marikna dagiti ubbing a natalged ken masuportaran, nga addaan iti akses kadagiti espasio a kasapulanda tapno tumanor ken rumang-ayda,” innayonna.
Buyogan ti napasnek a panagkumitna a mangparnuay iti Filipinas a naisentro kadagiti ubing, idagdagadag ni Senador Villar kadagiti policymakers, developers, ken dagiti lokal a lider nga itipon ti child-friendly urban planning kadagiti long-term nga estratehiada. “Ti pagilian a mangipangpangruna kadagiti annakna ket maysa a pagilian a mangpatalged iti masakbayanna. Agtitinnulongtayo tapno agbalin a nataltalged, naberberde, ken ad-adda nga inklusibo dagiti siudadtayo para iti sumaruno a kaputotan.”
