Naarestar ken naipupok ti sumagmamano a Filipino iti Doha, Qatar gapu iti mapapati a di autorisado a panagralida idi Biernes, Marso 28, segun iti Embahada ti Filipinas iti Qatar.
Kinompirmar ti Embahada ti Filipinas iti Qatar idi rabii ti Biernes a napakaammuandan iti pannakakemmeg dagiti Filipino iti Doha, ket makium-umandan kadagiti autoridad ti Qatar tapno maipaayanda dagiti nasao a Filipino iti kasapulan a tulong.
Impaganetget ti embahada kadagiti Filipino iti Qatar a raemenda ti paglintegan ken kannawidan ti pagilian a yanda mainaig kadagiti panagrali ken panangyebkas iti politikal a riknada.
Saan a nangted ti embahada iti detalye ti panagrali no mainaig daytoy iti panagkasangay ni dati a presidente Rodrigo Duterte a nakabalud ita iti The Netherlands. (Betheena Unite/Manila Bulletin//Lito Hilidon/Bannawag)
