Kinompirmar ti Department of Foreign Affairs (DFA) a 16 a Filipino ti adda iti kustodia ti polisia iti Qatar gapu iti maipagarup a panagralida idi napan a lawas.
Segun ken ni Undersecretary ti DFA Eduardo de Vega, nawayawayaanen ti uppat kadagiti 20 a Filipino a naibalud. Tallo kadakuada ti menor de edad, ngem adda latta iti kustodia ti polisia ti ina dagitoy, ta imbestigarenda pay daytoy.
Maibatay iti Law No. 18 of 2004 ti Qatar, maibilang nga illegal dagiti di autorisado a panagrali, ta masapul ti pammalubos ti gobierno kadagiti maaramid a taripnong ken panagrali.
Kinuna ni De Vega a no maidarum dagiti nagrali a Filipino, maibaludda iti las-ud ti tallo a tawen, ngem impanamnamana a ti gobierno ti mangted iti abogado kadagiti naibalud a Filipino.
Kiddaw ni Kaufman kadagiti DDS: Raemen ti proseso ti korte
Kinuna ti opisial ti DFA a nalpasen a naimbestigar dagiti babbai a nakipaset iti rali, ket sumarunon dagiti lallaki.
Nupay naiduma ti sistema ti linteg iti Qatar, idawdawat ni De Vega a mawayawayaanto dagiti 16 a Filipino ket agmultada laengen imbes a maibaludda.
Madusa dagiti aglabsing iti di autorisado a panagrali iti Qatar iti pannakaideportar, pannakaibalud iti agingga iti 3 a tawen, ken pannakamulta iti agingga iti 50,000 a riyal wenno nasurok a ₱764,000. (Raymund Antonio/Manila Bulletin//Lito Hilidon/Bannawag)
