Adda pay laeng iti sidong ti polis ti 19 kadagiti 20 a Filipino a naarestar ken naibalud iti Qatar gapu iti di autorisado a panagralida idi Marso 28, segun iti maysa nga opisial ti Department of Foreign Affairs (DFA).
Iti maysa nga interbiu idi Marso 30, inlawlawag ni Undersecretary ti DFA Eduardo de Vega a 20 ti naarestar a Filipino, saan a 17 kas iti damo a naipakaammo.
Kinuna ni De Vega nga nawayawayaanen ti maysa kadagiti naarestar, ket tarigagayanda a mairuar ida amin iti pagbaludan.
Impakaammo ti Embahada ti Qatar idi Biernes ti rabii nga adda naarestar a Filipino gapu iti maipagarup a panagralida nga awan pammaalubos ti gobierno ti Qatar.
16 nga OFW a nagrali iti Qatar, mabalin a maibalud iti 3 a tawen
Kinuna ni De Vega a mabalin nga adda pakainaigan dagiti naarestar a Filipino iti rali a mangsupsupiat iti pannakakemmeg ken pannakaibalud ni dati a presidente Rodrigo Duterte iti International Criminal Court (ICC).
Impaganetget manen ti Embahada ti Filpinas iti Qatar ti pakdaarda kadagiti Filipino iti Middle East a dida labsingen ti lokal a paglintegan ken kannawidan dagiti yanda a pagilian no maipapan iti panagrali ken panangipeksa iti politikal a kaririknada.
Iti sabali a bangir, indagadag ni dati a presidente Duterte kadagiti pasurotna a dida makibiang iti kasona iti ICC, ket bay-anda a dagiti abogadona ken ti ICC ti mangimaton iti pannakabistana nga awan impluensia manipud iti ruar.
Binalakadanna pay dagiti pasurotna (nga am-ammo kas Duterte Diehard Supporters wenno DDS) a saanda koma a pagsasaritaan ti kasona iti publiko. (Argyll Cyrus Geducos/Manila Bulletin//Lito Hilidon/Bannawag)
