Tallo a tao ti nadangran iti maysa nga insidente ti road rage iti Barangay San Jose, Siudad ti Antipolo idi Marso 30, idi pinaltogan ida ti maysa a motorista, a drayber ti maysa nga sports utility vehicle.
Sakbay ti insidente, naipakita iti maysa a video a kaginnubal ti suspek ti maysa a lalaki a naka-helmet (rider ti motorsiklo), bayat nga agan-anawa dagiti dadduma. Kellaat nga inasut ti suspek ti paltogna ket pinaltoganna ti kalabanna a lalaki a dagus met a naarinuknok.
Iti sabali a video, makita ti biktima a naka-helmet a kaduana ti maysa pay a naka-helmet met laeng rider ket pagam-ambonanda a dandanogen ti suspek sakbay ti panangpaltog daytoy kadakuada.
Segun ken ni Ynares, namin-adu a pinaputok ti suspek ti paltogna kalpasan a mapaltoganna ti kaapana a rider, natamaan ti maysa pay a tao, ket di inggagara a napuntaanna pay ti mismo nga asawana.
16 nga OFW a nagrali iti Qatar, mabalin a maibalud iti 3 a tawen
Innayon ni Ynares a naitaray a dagus iti ospital dagiti biktima, agraman ti asawa ti suspek, ket kritikal ti kasasaad ti maysa a biktima.
Segun ken ni Antipolo City Mayor Jun Ynares, pinanggep ti suspek ti aglibas ngem kinamat dagiti polis ket naarestar daytoy iti maysa a checkpoint.
Binigbig dagiti autoridad ti suspek a ni "Kenneth," 28. Addan daytoy iti kustodia ti polisia.
Binalakadan ni Ynares dagiti motorista nga agtalinaedda a kalmado iti kalsada iti amin a tiempo, agmanehoda a sitatalna, ken dida makiriri kadagiti padada a motorista. (Richielyn Canlas/Manila Bulletin//Lito Hilidon//Bannawag)
