Mapukpukaw ti uppat a Filipino iti Myanmar kalpasan a dinayyeg ti magnitude 7.7 a ginggined idi Marso 28, segun iti maysa nga opisial ti Department of Foreign Affairs (DFA).
Impakaammo ti National Unity Government ti Mayanmar ti unilateral ceasefire iti pagilian idi Sabado tapno mawayaan ti pannakaipaay iti tulong kadagiti naapektaran.
Mapanen a 1,644 ti bilang dagiti tao a natay, 139 ti mapukpukaw, ken 3,408 dagiti nadangran.
Iti maysa nga interbiu itay Marso 30, Kinuna ni Undersecretary ti DFA Eduardo de Vega a dua nga agassawa kadagiti uppat a Filipino ti aggigian iti narba a pasdek bayat ti ginggined.
Kiddaw ni Kaufman kadagiti DDS: Raemen ti proseso ti korte
Agtrabtrabaho iti opisina wenno mannursuro dagiti mapukpukaw a Filipino.
Innayon ti DFA nga agkidkiddaw ti Myanmar iti tulong manipud iti sabali a pagilian.
Iti maysa a paskil iti Facebook itay Marso 30, inwaragawag ti Embahada ti Filipinas iti Yangon nga agtultuloy ti panangbantayda kadagiti naapektaran a Filipino ket silulukat amin a linia ti komunikasion tapno maipaayan ida iti nasken a tulong.
Iti sabali a bangir, kinuna ni De Vega nga awan ti naapektaran a Filipino iti Thailand. (Argyll Cyrus Geducos/Manila Bulletin//Lito Hilidon/Bannawag)
