Walo a police officer ti Antipolo City Police ti binigbig ti Philippine National Police (PNP) gapu iti naballigi a panangtiliwda iti 28-anios a negosiante a nangpaltog iti uppat a tao bayat ti insidente ti riribuk iti kalsada iti Siudad ti Antipolo idi Domingo, Marso 30.
Kinuna ni hepe ti PNP Gen. Rommel Marbil a naikkan dagiti sumaganad a polis iti Medalya ng Kagalingan (Medal of Merit) gapu iti madagdagus a panagrespondeda iti pammaltog:
- Lieutenant Orlando Santos
- Chief Master Sergeant Rannel Cruz
Kiddaw ni Kaufman kadagiti DDS: Raemen ti proseso ti korte
- Corporal Kaveen-John Vea
- Corporal Joeban Abendaño
- Corporal Niño Chavez
- Patrolman Reylan De Chavez
- Patrolman Michael Keith Panganiban
- Patrolman John Marc Manahan
Segun ken direktor ti Rizal Police Provincial Office (Rizal PPO) Col. Felipe Maraggun, maipila ti kaso a frustrated homicide, panaglabsing iti Comprehensive Firearms and Ammunition Regulation Act, kasta met ti election gun ban kontra iti suspek a ni alias "Kenneth."
Segun iti report ti polis, napasamak ti pammaltog iti agarup alas 5 iti malem iti igid ti Marcos Highway iti Barangay San Jose kalpasan a mapapati a pinadamgisan ti suspek a mangmanmaneho iti nangisit a Toyota Fortuner ti maysa a nakamotorsiklo.
Kinamat ti rider ti nasao a motorsiklo, a kaduana dagiti dadduma pay a motorcycle rider, ti lugan ni Kenneth agingga a mapapati a binangenanda daytoy ket ditoy a napasamak ti dinnanogan, iti batog ti maysa a pagkapean a nagsardenganda, a nangitunda iti panangpaltog ti suspek kadagiti kaapana.
Ita a Lunes, Marso 31, rimmuaren iti ospital a nakaitarayanda dagiti nasugatan iti pammaltog. Nupay kasta, kritikal pay laeng ti kasasaad ti rider a napaltogan ti ulona ket madama pay laeng a maop-operar daytoy.
Natiliw ni Kenneth iti maysa a checkpoint iti Masinag iti Barangay Mayamot, kalpasan ti panangkamat kenkuana dagiti polis. (Patrick Garcia/MANILA BULLETIN)
