Gapu iti kaadu a trabaho, di umdas a bakasion, ken nakaro a kasasaad ti panawen, kiniddaw ti maysa a gunglo dagiti mannursuro iti Department of Education (DepEd) nga ipatungpalda koma ti "teacher-friendly" a panagbalbaliw iti School Year (SY) 2025-2026.
Impaganetget ti Teachers' Dignity Coalition (TDC) ti kiddawda a pannakabalbaliw tapno masigurado ti natalged ken makaay-ayo iti mannursuro nga iskediul para iti umay nga school year.
Segun iti TDC, idatagda ti lima a kangrunaan a singasingda iti DepEd tapno mapasayaat ti kasasaad dagiti mannursuro ken ti sistema ti panangisuroda, agraman dagiti estudiante.
Maysa kadagiti singasing ti TDC ti panangnayon kadagit aldaw a pangsaluad iti kalendario ti pagadalan tapno nalaka a mabaliwan no adda dagiti di mapakpakadaan a pasamak kas kadagiti natural a didigra wenno pannakasuspenso ti klase.
16 nga OFW a nagrali iti Qatar, mabalin a maibalud iti 3 a tawen
Insingasing ti TDC ti periodic health break iti di nababbaba iti dua nga aldaw kalpasan ti quarterly examination dagiti ubbing, tapno makliklikan ti pannakapaksuy ti bagi ken panunot dagiti mannursuro ken estudiante.
Maysa pay a singasing ti TDC ti pannakayababa ti In-Service Training (INSET) iti tallo laeng aldaw, a gagangay nga agpaut iti makalawas; agraman ti pannakaisardeng ti aktibidad iti Sabado kas iti PTA meeting ken card distribution.
Namnamaen ti TDC nga anamongan ken ipatungpal ti DepEd dagitoy a singasingda para iti SY 2025-2026. (Merlina Hernando-Malipot/Manila Bulletin/Bannawag)
