Impaganetget ni Defense Secretary ti Estados Unidos (US) Pete Hegseth idi Marso 30 a "napateg a kadua" ti Japan iti pananglapped iti kumarkaro a kinapinget ti China iti rehion ken impakaammona ti panagbalin ti US military command iti Japan a kas baro a "war-fighting headquarters."
Iti panagsaritada ken ni Defense Minister ti Japan Gen Nakatani iti Tokyo, impaganetget ni Hegseth nga adu pay ti masapul nga aramiden dagiti dua a pagilian tapno mapapardas ti pannakapapigsa ti kabaelan ti militarda a mangsango iti militar a tignay ti China ken iti posible nga emerhensia iti Taiwan.
Daytoy a sao ni Hegseth ti nangpatalged iti Japan ken nangwaknit iti pakaseknan ti Japan no kasano a tamingen ni Presidente ti US Donald Trump ti pannakisinggalut ti US iti rehion iti sidong ti programana nga "America First."
Immanamong dagiti dua a pagilian a papardasenda ti panagtinnulongda a mangbukel iti missile kas iti Advanced Medium-Range Air to Air Missiles (MRAAM), ken iti SM-6 surface-to-air missile, tapno marisut ti parikut a panagkurang ti armas.
Myanmar, Thailand, nadayyeg iti 7.7 a ginggined
Anamongan dagiti dua a pagilian a masapul a papigsaenda ti depensa ti Japan iti Southwestern islands, a kritikal a lugar kadagiti pagsusupiatan a lugar iti East China Sea ken iti asideg ti Taiwan tapno mapapigsa pay ti puersada a manglapped iti pangta ti China. (Associated Press/Manila Bulletin//Lito Hilidon/Bannawag)
