Kinuna ni DFA Undersecretary for Migrant Workers Affairs Eduardo de Vega a mabalin a mangiwayatda iti repatriation program kadagiti Filipino nga adda iti Myanmar a naawanan iti trabaho gapu iti ginggined a nangdayyeg iti nasao a pagilian.

“Sa Myanmar maaaring magkakaroon ng repatriation program dahil may mga nawalan ng trabaho. Iniimbestigahan ng embassy para bigyan ng tugon ang kanilang request,” kinunana idinto nga innayonna a kastoy met laeng ti inaramidda idi naginggined ti Turkiye idi 2023.

Maysa a paset ti Naypyitaw, Myanmar a nadidigra iti ginggined a nangdayyeg iti pagilian a Myanmar. Naala ti ladawan idi kalman (Domingo), Marso 30, 2025. (AP Photo/Aung Shine Oo)

Iti panagparangna iti GMA Integrated News’ Unang Balita, inako ketdi ni De Vega nga adda uppat a Filipino a sapsapulenda pay laeng idiay Mandalay, Myanmar, ta adda dagitoy iti maysa kadagiti pasdek a narpuog gapu iti ginggined.

“Dinaramdam ko pero mahirap maghanap… Kaya gagawin namin ang lahat nang magagawa para mahanap sila,” kinuna ni De Vega.

Nasional

Makabayan bloc, mangipila iti baro nga impeachment complaint kontra ken ni VP Duterte kalpasan ti one-year ban

Saanna ketdi a masigurado nga adda nairaman a Filipino kadagiti natay iti ginggined. “Kasi habang hindi pa nakukumpirmado hindi tayo pwedeng mawalan ng pag-asa,” kinunana.

Kinuna ni De Vega a ti umuna nga aramiden ti gobierno ti Filipinas ket isu ti panangsapulna kadagiti Filipino nga adda kadagiti siudad a dinayyeg ti ginggined a kas iti Mandalay, Naypyidaw, ken Yangon. Iti agdama, adda 150 a Filipino, a kaaduanna kadagitoy ti propesional, ti agtrabtrabaho iti Mandalay.

Iti Thailand, kinuna ketdi ni De Vega nga awan Filipino a naireport a naapektaran. (Bannawag News Team)