Naarestar dagiti kameng ti Criminal Investigation and Detection Group (CIDG) ti maysa a dati a kameng ti Abu Sayyaf Group (ASG) a suspek kadagiti panangkidnap iti Basilan ken kabangibang a lugar, iti naiwayat nga operasion iti Siudad ti Zamboanga.
Segun ken ni direktor ti CIDG Maj. Gen. Nicolas Torre III , nakemmeg ni Abu Raba, 52, kalpasan iti 15 a tawen a panaglemmengna kadagiti autoridad a mangsapsapul kenkuana gapu iti pannakairamanna, saan laeng nga iti panagkidnap, no di ket pay iti kaso ti extortion, terorismo, ken panangraut kadagiti soldado ti gobierno.
Kalpasan a naipaulog iti arrest warrant kontra ken ni Abu Raba idi 2009, naglemlemmeng daytoy ken nagakar-akar iti pagyananna manipud iti Basilan agingga iti nadumaduma nga isla ti Bangsamoro Autonomous Region ken Zamboanga Region tapno liklikanna ti pannakaarestarna.
Maibatay iti panagimbestigar, ni Raba ket adda iti sidong ti daulo ti ASG a ni Isnilon Hapilon.
Sara Duterte, agsagsaganan nga agawid iti pagilian
Kinuna ni Torre a nakemmegda ni Raba idi Marso 31 iti Barangay Dita, Siudad ti Zamboanga babaen ti nagtipon a puersa ti polis, militar, ken ti intelligence community. (Aaron Recuenco/Manila Bulletin//Lito Hilidon/Bannawag)
