Binaon ti gobierno ti Filipinas ti emergency response team (ERT) iti Myanmar tapno tumulong kadagiti naapektaran ti magnitude 7.7 a ginggined idi Marso 28, a nanggudas iti biag ti 2,000 a tao.
Paset daytoy ti Philippine Inter-Agency Humanitarian Contingent (PIAHC), nga idauluan ti Office of Civil Defense (OCD).
Pimmanaw ti bunggoy ti ERT idi parbangon ti Abril 1 manipud iti Villamor Airbase a naglugan iti dua a C-130 nga eroplano ti Philippine Air Force (PAF).
Kinuna ni Sekretario ti Department of Health (DOH) Ted Herbosa a nagkiddaw iti tulong ti Myanmar, isu a naibaon ti ERT a pagkamengan iti 91 a tao.
20 a pakigubat nga eroplano, ilako ti US iti Filipinas
Kadagitoy a 91, 32 ti paset ti World Health Organization (WHO)-certified Philippine Emergency Medical Assistance Team (PEMAT), idinto a ti dadduma ket kameng ti Urban Search and Rescue Unit ti Bureau of Fire Protection (BFP), ti Armed Forces of the Philippines (AFP) Disaster Response Unit, ken dagiti piloto ti PAF.
Mangipaay ti ERT iti trauma care, life support, serbisio para iti agas, panangtaming iti makaakar a sakit, ken pannakaiturong dagiti pasiente.
Segun ken ni Herbosa, umdas ti alikamen ti ERT iti las-ud ti dua a lawas, ket sisasaganada no kasapulan a mailayon ti misionda, idinto a nakasagana ti kanayonan a bunggoy a mangted it suplay wenno mangsandi iti grupo tapno maliklikan ti pannakapaksuy dagiti nagboluntario. (Jel Santos/Manila Bulletin//Lito Hilidon/Bannawag)
