Natay ti maysa a barangay chairman ti Paitan iti ili ti Santa Maria, Pangasinan idi Abril 1 kalpasan a pinaltogan ti nakamotor a lalaki.

Nabigbig dagiti polis ti biktima a ni Rolando Fernandez Albino, 60.

Segun iti panagimbestigar dagiti polis, manmanehuen ti biktima ti barangay patrol tricycle idi pinara ti tao a nagaruat iti nangisit a jacket ken agmanmaneho iti motor a Honda Click 125.

Idi simmardeng ti biktima, pinaltogan ti suspek nga addaan iti kalibre .45 a pistola.

Lokal

Umdas a suplay ti ikan iti Ilocos Region, impasigurado ti BFAR

Timmakias a dagus ti suspek, idinto a naitaray iti ospital ti biktima ngem naideklarar daytoy a natay gapu iti kaadu a sugatna.

Naala dagiti polis ti magasin ti kalibre .45 a paltog iti nakapasamakan ti krimen.

Nangisayangkat dagiti polis iti checkpoint bayat a sapsapulenda ti suspek. (Liezle Basa Iñigo/Manila Bulletin//Lito Hilidon/Bannawag)