Kiniddaw ti abogado ni dati a presidente Rodrigo Duterte kadagiti pasurotna wenno dagiti maaw-awagan iti Duterte Diehard Supporters (DDS) a raemenda koma ti proseso ti hustisia ket saanda a bumibiang iti kinaagwaywayas ti Korte.
Segun ken ni abogado Nicholas Kaufman idi Abril 1, kayat nga idanon ni dati a presidente Duterte kadagiti pasurotna ti mensahena a raemenda koma ti judicial process.
Kinuna ni Kaufman kadagiti amin a maseknan-- iti prosekusion, depensa, kadagiti abogado, ken kadagiti biktima -- a ramenda koma ti entero a proseso.
Nangangay dagiti DDS kadagiti panagrotestar, rali, ken demonstrasion iti nadumaduma a pagilian kas panangsupiatda iti pannakaibaludna iti The Hague, a nakaigapuan met iti pannakaipupok ti 16 a DDS nga overseas Filipino workers (OFWs) iti Qatar, gapu iti illegal a panagralida idi napan a lawas.
20 a pakigubat nga eroplano, ilako ti US iti Filipinas
Iti met social media, riniribuk dagiti DDS ti personal nga account dagiti ukom ti International Criminal Court (ICC), ken patpatulodanda iti mensahe ti Amerikano a mannurat a ni Nicholas Kaufmann, iti panangipagarupda nga isu ti abogado ni Duterte. (Raymund Antonio/Manila Bulletin//Lito Hilidon/Bannawag)
