Imbilin ti hepe ti Armed Forces of the Philippines (AFP) a ni Gen. Romeo Brawner Jr. iti Northern Luzon Command (Nolcom) a rugianda ti panagsagana para iti plano a panangisalakan kadagiti Filipino iti Taiwan iti kanito a rauten wenno sakupen ti China ti isla.
Adda agarup 250,000 nga overseas Filipino workers (OFW) iti Taiwan ket kinuna ni Brawner a kasapulan ti panangisagana kadagiti kasapulan nga addang tapno masigurado ti kinatalged ken seguridad dagiti nasao nga OFW no mapasamak ti armado a panagdadangadang.
Inyebkas ni Brawner ti panagtalekna iti kabaelan dagiti puersa militar a naikkan iti annongen a mangipaay iti seguridad akin-amianan a paset ti pagilian iti baet dagiti agresibo a programa ti modernisasion a pakairamanan ti pananggun-od kadagiti moderno a gamigam ti militar.
Kinuna ni Brawner a ti Nolcom ti front liner ti pagilian iti amianan a hemisphere. Nakitana ketdi a sisasagana ti Nolcom para iti territorial defense ket piandayawanna daytoy kabayatan ti selebrasion ti anibersario ti Nolcom idi Abril 1.
Camille Villar: Nasken a marisut ti parikut iti umad-adu nga agsiksikog a tin-edier iti pagiliantayo
“Dikay' mapnek iti panangsigurado iti seguridad laeng ti akin-amianan a hemisphere agingga iti Mabulis Island. Rugianyo ti agplano kadagiti tignay no bilang ta rautenda ti Taiwan,” kinuna ni Brawner.
Iti kaadu dagiti Filipino iti Taiwan, kinuna ni Brawner nga awanen ti pagpilian ti Filipinas no di ti mangpanunot kadagiti kasayaatan nga addang tapno masalakniban dagitoy.
“Ilawlawatayo ti sakup ti operasiontayo. Ngamin no adda mapasamak iti Taiwan, di maliklikan a mairamantayo,” kinuna ni Brawner.
“Adda 250,000 nga OFW nga agtrabtrabaho iti Taiwan ket masapul nga isalakantayo ida. Ket pagrebbengan ti Northern Luzon Command ti adda iti front line daytoy nga operasion,” ingganetgetna.
Agresibo a mangisaysayangkat ti China kadagiti war games iti South China Sea a pakairamanan dagiti lugar nga asideg iti Taiwan, a kalikagumanna a sakupen nga inayon iti teritoriona iti panaglabas dagiti tawen.
Iti sabali a bangir, mangisaysayangkat met ti Taiwan kadagiti agresibo a panagbangon kadagti militar a pasilidad a pakairamanan ti pananggun-od kadagiti moderno a gamigam ti militar kas panagsagana iti ania man a plano ti panangraut ti China.
Iti biang ti militar ti Filipinas, kinuna ni Brawner addan dagiti puersa ti Nolcom iti babaen ti nainget a military exercises ken readiness assessment babaen kadagiti war games ken dadduma pay a military exercises a kadagiti dadduma a pagilian. (Aaron Recuenco/MANILA BULLETIN)
