Pinalubosanen ti gobierno ti Estados Unidos (US) ti posible a panangilakoda iti 20 nga F-16 fighter jets iti Filipinas, nga aggatad ti US$5.58 a bilion wenno agarup ₱319 a bilion.
Impalnaad ti Defense Security Cooperation Agency (DSCA) ti State Department ti US idi Abril 2 a nagkiddaw ti gobierno ti Filipinas a gumatang iti 16 nga F-16 C Block 70/72 ken uppat nga F-16 D Block 70/72 nga eroplano, ket ti Lockheed Martin ti kangrunaan a contractor daytoy.
Naipakaammo daytoy a posible a pannakailako kalpasan ti isasarungkar ni Sekretario ti US Defense Pete Hegseth iti Filipinas idi Marso 28 ket nakasaritana ni Sekretario ti Department of National Defense (DND) Gilberto Teodoro Jr.
Mairaman iti package dagiti nadumaduma a weapons systems, radar, guided missile launchers. ken agduduma a missile, anti-aircraft guns, general purpose bombs, attack munition, electronic countermeasure systems, spare parts, engines, ken dadduma pay a non-major defense equipment. Maipaayto pay ti panagsanay, simulator, teknikal a suporta, ken dadduma pay a mainaig nga elemento ti logistics ken suporta.
Camille Villar: Nasken a marisut ti parikut iti umad-adu nga agsiksikog a tin-edier iti pagiliantayo
Segun iti DSCA, daytoy a panangilako ket paset ti foreign policy ken national security ti US babaen ti panangtulongda iti seguridad ti kaasmangda nga ibilangda a napateg a puersa para iti kinatalged ti politika, kinatalna, ken panagdur-as ti ekonomia iti Southeast Asia.
Kinuna ti pannakangiwat ti DND a ni Asst. Sec. Arsenio Andolong a saanda pay a naawat ti ania man a pakaammo mainaig iti panangilako ti US iti kadagiti nasao nga eroplano.
Siraragsak ti Armed Forces of the Philippines (AFP) nga umawat iti daytoy a development ta dakkel a tulong daytoy iti pannakapamoderno ti militar.
Inanamaen ti US DSCA a ti posible a pannakailako dagiti F-16 fighter jet iti Filipinas ket saan a mangbaliw iti kangrunaan a pannakatimbeng iti militar a puersa iti rehion. (Martin Sadongdong/Manila Bulletin//Lito Hilidon/Bannawag)
