Impeksa ni Camille Villar ti pannakaalarmana iti agtultuloy a yaadu dagiti naubbing a babbai iti pagilian nga agsiksikog, a kaaduanna kadagitoy ti aggapu kadagiti nakurapay a kaamaan.
Tapno marisut daytoy a parikut, kinuna ni Villar a nasken ti sapasap a pannakayadal ti epekto ti nasapa unay a panagsikog.
Dinakamat met ni Villar ti kinapateg ti pannakasuportar dagiti naubbing pay nga inna babaen ti pammalakad ken babaen dagiti espesial a programa a makatulong kadakuada.
“Kinapudnona, daytoy ti maysa a parikut a rumbeng unay a sanguentayo ta kasla mapanen a 30 a porsiento ti nginatuan ti teen pregnancies, a mangrugi manipud kadagiti agtawen iti 14 agingga iti 16,” kinunana iti maysa a press conference a naangay itay nabiit iti Talisay City, Negros Occidental.
AFP, sisasagana a mangsuportar iti 3 a Filipino a naibalud iti China
“Mainaig iti daytoy, patiek a maysa kadagiti wagas a panglapped iti daytoy ti pannakayammo ti epekto ti nasapa a panagsikog ken ti ibungana iti biag dagitoy agbalin a naubbing nga inna,” innayonna ta kas kunana, maipasangonto dagitoy iti panagtaraken kadagiti annakda ken iti panangbangonda iti bukodda a pamilia.
Dinakamat pay ni Villar ti panangkita ti publiko kadagitoy kakastoy a kaso nga addaan pannakaaawat tapno saan a mailanglangi wenno maikkan iti dakes a pakasarsaritaan dagitoy tin-edier nga inna.
“Dagiti met nagbalin a biktima ti nasapa a panagsikog, kasapulanda ti naan-anay a suportatayo. Siempre, kasapulanda met ti pinansial a tulong, ken no kasano a matakderanda ti panagbalinda nga inna, ken iti panangbukelda iti bukodda a kaamaan,” innayon ni Villar.
