Imbilin ti Sandiganbayan ken ni Senate President Pro Tempore Jose "Jinggoy" Estrada a mangidatag iti ebidensiana iti 11 a graft charges a naipila kontra kenkuana mainaig iti ₱183 a milion a Priority Development Assistance Fund (PDAF)-na.
Naipaulog ti bilin kalpasan a pinengdan ti anti-graft court ti demurrer to evidence wenno panagkedked a mangiparang iti ebidensia nga impila ni Estrada idi Peb. 22, 2024 ken Sept. 19, 2024.
Sidadarum ni Estrada iti 11 a kaso iti panaglabsing iti Section 3(e) ti Republic Act No. 3019, Anti-Graft and Corrupt Practices Act, gapu iti mapapati a panangibulsana iti ₱183,793,750 manipud iti PDAF-na babaen ti maipagarup a panangyendorsona kadagiti palso a non-government organization (NGO) a kukua ti negosiante a ni Janet Lim Napoles idi 2004.
Na-dismiss ti kasona a plunder idi Enero 19, 2024 a mainaig met laeng iti PDAF. Nupay kasta, naduktalan a nakabasol iti maysa a kaso a direkta a panagsuksok ken dua a kaso ti saan a direkta a panagpasuksok.
Napudot a panawen, agtalinaed gapu iti nabara nga angin nga aggapu iti Taaw Pasipiko
Iti panagkedkedna a mangiparang iti ebidensia, kinuna ni Estrada a rumbeng nga alaen ti korte ti judicial notice iti findings iti kasona a plunder iti panagkalikagumna a ma-dismiss met dagiti kasona a graft.
Nupay kasta, kinuna ti korte a daytoy ket "mistaken premise" gapu ta "ti kasta a kapanunotan ket pukawenna ti panagkita kadagiti nagdudumaan dagiti elemento dagiti krimen ti plunder ken graft." (Czarina Nicole Ong Ki/MB)
