Lima a tao ti natay ken 9 ti nadangran gapu iti pannakatinnag ti naglugananda a van iti Barangay Ampawilen, Sadanga, Mountain Province idi Abril 4.
Segun iti Sadanga Municipal Police Station, naitapuak iti rangkis ti puraw a van nga addaan iti plate number NDA-9883, ta naawan ti kontrol ti drayber iti lugan gapu iti kinagalis ti kalsada a gapuanan ti bayakabak iti 10:00 ti rabii.
In-rescue dagiti autoridad ti natnag a van ket naideklarar a dead on the spot ti drayber ken ti tallo a pasahero daytoy.
Nabigbig dagiti biktima a da Vance Quinto Hernandez Jr., 45, drayber; Gerardo Navarro, 36; Veronica Hipolito, 36; ken maysa a babai a nagaruat iti gray a t-shirt ken nangisit a leggings.
Sara Duterte, agsagsaganan nga agawid iti pagilian
Ti maikalima, ni Niño Belando, ket naideklarar a dead on the arrival iti ospital.
Naitaray dagiti nadangran iti Bontoc General Hospital, a da Mary Joy Reyes, 45; Archie Reyes, 25; Cherish Quimpan, 20; Manuel Lap, 26; Elvis Acupan, 25; Ham Sua, 23; Arlette Sarmiento, 23; Christine Cuidamat, 20, ken Dan Dacoycoy, 24.
Segun iti report, mapanda iti Tinglayan, Kalinga idi napasamak ti aksidente.
Pinalagipan ti polis dagiti drayber nga agannadda no agmanmanehoda kadagiti kabambantayan ti Cordillera, nangruna no agtudtudo. (Zaldy Comanda/Manila Bulletin//Lito HIlidon/Bannawag)
