Maysa ni kandidato a para Senador Camille Villar kadagiti timmabuno iti pangrikep a programa iti pannakarambak ti 2025 National Women’s Month idiay Baybay City ket sadiay, impanawaganna ti maysa nga inklusibo a gimong ken ad-adda a suporta iti gender equality.
Iti panagsaritana iti bunggoy dagiti lokal a lider, kameng ti komunidad, ken grupo dagiti babbai iti Baybay City idiay Leyte idi Huebes, Marso 27, inyunay-unay ni Villar ti napateg nga akem dagiti babbai iti benneg ti pamilia ken serbisio publiko.
“Saantayo laeng a silaw ti pagtaengan,” kinunana. “Datayo pay ti silaw ti siudad. Karamantayo iti panagdur-as dagiti siudad.”
Binigbigna dagiti kontribusion dagiti lokal a lider ti Baybay a pakairamanan da Philippine Councilors League Chapter President Carmen Cari, Mayor Boy Cari, Vice Mayor Ernesto Butawan, ken Rep. Carl Nicolas Cari. Nagyaman kadakuada iti intedda kenkuana a gundaway a makipagrambak iti Women’s Month iti siudadda.
Sara Duterte, agsagsaganan nga agawid iti pagilian
Impaganetget ni Villar ti kinapateg ti panangsuportar kadagiti babbai a dadaulo ket ginutigotna dagiti babbai nga ad-adu pay koma kadakuada ti umawat kadagiti akem iti panagserbi iti laksid ti kaadu dagiti tamingenda iti pagtaengan ken iti pagtrabahuan.
“Saan nga umdas ti maysa a bulan a panangrambak kadagiti maaramidan dagiti babbai,” innayonna ken dinakamatna ti bileg dagiti babbai a mangiturong iti panagbalbaliw saan laeng nga iti uneg ti pagtaengan no pay di ket kadagiti probinsia ken nadumaduma a sektor.
No mangabak a Senador inton Mayo, inkari ni Villar nga idur-asna dagiti gakat a naisentro iti karbengan ken pagimbagan dagiti babbai pakairamanan ti pannakaipila manen ti Pregnant Women Welfare Act ken ti Equal Maternity Protection Act, agpada a nairanta a mangpasayaat iti healthcare ken labor protection para kadagiti inna a Filipino.
Ti nasao nga aktibidad idiay Baybay ket nagserbi a plataporma para ken ni Villar tapno maikampaniana ti nabayagen nga adbokasiana para iti pannakapabileg dagiti babbai.
