Kalpasan ti dandani makabulan, agsagsaganan ni Bise Presidente Sara Duterte nga agsubli iti Filipinas ta nalpasen ti rumbeng nga aramidenna iti The Hague, a mangtulong iti amana a ni dati a presidente Rodrigo Duterte a naibalud iti International Criminal Court (ICC) detention center.
Iti maysa nga interbiu, kinuna ni BP Duterte a naipaayen dagiti legal ken personal a kasapulan ni tatangna, ken addan nakasaritana mainaig iti panagtalianed ni tatangna iti sidong ti ICC, isu a mabalinnan ti agawid.
Kadua ni BP Duterte iti Netherlands ti kabsatna-iti-ama a ni Veronica Duterte ken ti ina daytoy a ni Honeylet. Sumangpetto metten ni Diputado Paolo Duterte, a sarunuen ni Davao City Mayor Sebastian Duterte.
Adda ni BP Duterte iti Netherlands sipud pay idi Marso 12, maysa nga aldaw kalpasan a maarestar ni tatangna iti Manila gapu iti kaso a crimes against humanity.
Pannakapabileg dagiti babbai, ikamkampania ni Camille Villar
Segun ken ni BP Duterte, maik-ikkan iti medikal a serbisio ni tatangna bayat a nakabalud iti ICC, ket adda panagtalekna kadagiti doktor iti Netherlands.
Iti sabali a bangir, inkeddeng ti pamilia Duterte a saanda nga umawat iti donasion a mangpondo kadagiti abogado ti dati a presidente wenno kadagiti gastuenda bayat ti kaaddada iti The Hague.
Innayon ni Duterte a napagnunumuanda a saanda a dumawat iti tulong wenno donasion ta addaanda met amin (nga agkakabsat) iti panggedan. (Argyll Cyrus Geducos/Manila Bulletin//Lito Hilidon/Bannawag)
