Sisasagana dagiti pagilian a kaaliado ti North Atlantic Treaty Organization (NATO) ken ti Canada a mangbusbos iti ad-adu a pondo para iti depensa, ngem anamonganda ti kiddaw ti Estados Unidos (US) a kadakkel ti badiet ti militar, nangruna ta sidadaan ni Presidente Donald Trump nga umasideg iti daulo ti Russia a ni Vladimir Putin.
Binilion a doliar ti busbusbosen dagiti kaaliado ti US para iti depensa sipud idi imbilin ni Putin ti naan-anay a panangsakupna iti Ukraine tallo a tawenen ti napalabas, ngem dandani kakatlo pay laeng kadakuada ti nakatungpal iti gandat ti NATO a di nababbaba ngem iti 2% ti gross domestic product ti pagilian ti busbosenda.
Segun ken ni Trump, rumbeng nga agkumit dagiti kaaliado ti US a mangbusbos iti di kumurang a 5 a porsiento, ngem saan pay a naaramid ti kastoy kaadu a panangbusbos. Maibatay iti bilang ti NATO, mapattapatta a 3.38 a porsiento ti binusbos ti US idi napan a tawen, ti kakaisuna a kaaliado a bimmaba ti gastosna iti napalabas a dekada.
Iti biang ni Foreign Minister ti Canada Melanie Joly, masapul nga anamongan amin a kameng ti NATO a ti Russia ti pangta, ta no saan, awan ti rason a manayonan ti panaggastos iti militar.
Bilang ti natay iti ginggined iti Myanmar, nasuroken a 3,000
Iti maysa a summit ti NATO itay napan a tawen, inanamongan dagiti lider ti NATO a ti Russia latta ti kangrunaan a pangta iti kinatalged dagiti kameng ti NATO.
Segun ken ni Secretary of State ti US Marco Rubio, saanda a pilpiliten a tungpalenda a dagus ti 5% a panangbusbos ngem dayta ti kasapulan nga aramiden dagiti kameng ti NATO tapno mabalinda a sarangten dagiti ibilangda a pangta.
Kinuna ni Rubio nga agtultuloy latta a makipaset ti US iti NATO, ket gandatda a tungpalen ti gandat a 5% a panangbusbos, ngem masapul met a papigsaen dagiti kaaliadoda ti bukodda a kabaelan.
Segun ken ni Foreign Minister ti France Jean-Noel Barrot, inkeddeng ti pagilianda ti target a 3% agingga 3.5% ket agsagsaganada a mangragpat iti 3% agingga iti 3.5%, a dandani pumada iti busbusbosen ti Amerika.
Kinuna ni Foreign Minister ti Norway Espen Barth Eide nga ar-aramidenen dagiti kameng ti NATO iti panangikeddeng iti baro a gandatda a panaggasto ket maipakaammo daytoy inton sumaruno a NATO summit a maangay inton Hunio. (Associated Press/Manila Bulletin//Lito Hilidon/Bannawag)
