Impasigurado ti Bureau of Fisheries and Aquatic Resources (BFAR) Ilocos Regional Office a sitatalinaed nga umdas ti produksion ti aquaculture ti rehion iti laksid ti kallabes a di panagsayaat ti paniempo ken ingangato ti temperatura.
Iti maysa a forum nga inangay ti Philippine Information Agency idi Abril 4, kinuna ni direktor ti BFAR Ilocos Region Rosario Segundina Gaerlan a nasurok a 100% ti self-sufficiency rate ti rehion, ken ti Pangasinan ti kaaduan ti kontribusion a suplay ti ikan.
Segun iti datos manipud iti Philippine Statistics Authority, agdagup iti nasurok nga 62,000 metric tons ti nairekord ti aquaculture production iti Ilocos Region idi 2024, a ti Pangasinan ti nakapataud iti 57,895 metric tons.
"Ad-adda nga ipampamaysami ti aquaculture no maidilig kadagiti dadduma a rehion a nangruna nga agpannuray iti capture fishing," kinuna ni Gaerlan.
Hepe, 3 a kameng ti PNP Pasuquin, nareliebo
Ti bangus ti kangrunaan a matartaraken, sarunuen ti tilapia, white shrimps, tirem, seaweeds, dadduma pay a kita ti pasayan, ken paltat.
Adda nasurok a 136,000 a mangngalap iti rehion, agraman dagiti adda iti aquaculture production, panagproseso, ken aglaklako, ken dadduma pay. (Hilda Austria/PNA)
