Impaganetget ni House Deputy Speaker Camille Villar ti napateg nga akem dagiti opisial ti barangay iti panagdur-as ti pagilian kabayatan ti pannakilangenna kadagiti lokal a lider ti General Trias, Cavite.
Iti panagsarita ni Villar iti sango ti Liga ng mga Barangay idi Pebrero 24, 2025, binigbigna ti dedikasion dagiti opisial ti barangay iti pannakataming kadagiti inaldaw a kasapulan dagiti komunidadda, kas panangipasigurado iti naballigi a pannakaipatungpal dagiti programa ti gobierno iti grassroots level.
“Dakayo dagiti pudno a mangbangbangon iti nasion! Dakkel la unay ti panagyamanmi ta maigapu iti kinasamayyo a kas Sangguniang Barangay, agtultuloy ti panagdur-as ti biag dagiti kailiantayo--dakayo a kanayon a mangkitkita iti inaldaw-aldaw a kasapulan dagiti kailiantayo, nakadakdakkel ti akemyo iti governance-tayo," kinuna ni Villar.
Kas nagpaay a pannakabagi ti Las Piñas iti dua a termino, impaganetget ni Villar ti kinapateg dagiti opisial ti barangay iti lokal a panagturay, kinatalged ti publiko, ken panagdur-as ti komunidad. Napaliiwna a napateg ti panangidauloda iti pannakasigurado a makadanon dagiti serbisio ken proyekto ti gobierno iti tunggal suli ti pagilian, a sakupen ti nasurok a 42,000 a barangay.
Dadduma nga opisial ti gabinete, napalubosan iti hearing ti Senado
“Maawatak ti kinarikut ti trabahoyo ta uray siak no mapmapanak iti distrito iti yanmi idiay Piñas, mariknak dagiti inalad-aladaw a karit a sangsanguen dagiti kailiantayo ket dayta ti mangdardarirag kaniak tapno saysayaatek ti panagkatrabahok ken panagserbisio-publiko,” innayonna.
Intampok ni Villar, kandidato a para senador iti eleksion inton Mayo 2025, ti napinget a panagtrabaho ken kinaregget dagiti opisial ti barangay iti pannakaipatungpal dagiti livelihood program, healthcare services, ken educational initiatives. Kinunana a ti panagreggetda ti mangtignay kenkuana nga agtultuloy nga agtrabaho a napinget para kadagiti umili a Filipino.
“Isu ngarud a dayta met ti inspirasionko tapno agtarigagayak nga agarapaap a tumulong iti ad-adu pay a kailiantayo,” kinunana. “Imetko ti sangapulo ket lima a tawen a padasko iti panangbangon iti pagbiagan, a kadua ti track record-ko iti dua a termino iti Kongreso--ammok nga adu pay ti maaramidak!”
Pinasingkedan manen ni Villar ti panagkumitna a mangikampania kadagiti polisia a mangitandudo kadagiti lokal a komunidad, nga inkarina a no mabotosan iti Senado, itultuloyna nga itandudo dagiti programa a mangpabileg kadagiti barangay ken mangpasayaat iti biag dagiti minilion a Filipino.
