Nagdonar ti gobierno ti Australia iti Philippine Coast Guard (PCG) iti unmanned aerial vehicles (UAVs) wenno drones nga agbalor iti ₱34 a milion agraman ti panagsanay ti panagpaandar ita nga aldaw, Abril 8, tapno mapabileg ti kabaelan ti pagilian iti maritime domain awareness (MDA).
Inawat ni PCG Commandant Admiral Ronnie Gil Gavan dagiti tulong nga impaay ti Embahador ti Australia iti Filipinas a ni Hae Kyong Yu iti naangay a handover ceremony iti Mariveles, Bataan.
Nagyaman ni Gavan iti gobierno ti Australia iti tulong nga impaayda a mangpapigsa iti kabaelan ti PCG a mangipatungpal iti annongenda a mangsalaknib iti baybay ti pagilian.
Duapulo a world-class drones ti naited iti PCG a pakairamanan ti uppat nga aldaw a panagsanay dagiti 30 a kameng ti PCG Aviation Command Unmanned Aerial Vehicles Squadron.
Nora Aunor, 71, pimmusay
Dagiti drone specialist manipud iti Department of Climate Change, Energy, the Environment and Water’s Office of the Chief Remote Pilot ti Australia ti immay iti Filipinas tapno mangsanay kadagiti nasao a kameng ti PCG.
Pinatibker ti Australia ken Filipinas ti civil maritime cooperation babaen ti Memorandum of Understanding (MoU) on Enhanced Maritime Cooperation idi 2024, kas panangitandudo iti panggepda a natalna, natalged, ken narang-ay a rehion, agraman panangraem iti international law. (Martin Sadongdong/Manila Bulletin//Lito Hilidon/Bannawag)
