Nangipaulog manen ti Commission on Elections (Comelec) iti show cause order para ken ni agngayangay a diputado ti Siudad ti Pasig Christian "Ian" Sia gapu iti insawangna iti publiko iti naangay panagkampaniana idi Abril 3.
Daytoy ti maikadua a show cause order ni Sia manipud iti Task Force on Safeguarding Against Fear and Exclusion in Elections (SAFE) ti Comelec. Ti immuna ket maigapu iti mapapati a di umisu nga angawna maipapan kadagiti solo parent.
Ket ita, nababalaw ni Sia gapu iti sinaona mainaig iti kababagi ti babai nga empleadona a managan iti "Jaja."
"Jaja, ania kad'ti langam idi 15 a tawenen ti napalabas? Narapis? Saan, nalukmegka. Sipud idi nagkuyogta, kastan ti bagim, Jaja," kinuna ni Sia.
Marcos, inkalikagumna ti disiplina iti kalsada iti baet ti yaadu ti mapagpagteng a road rage
"Ti puntosko ditoy, dayta kadi ti agbalin nga empleado ti maniak? Saan, apo," innayon ni Sia.
Kinuna ti SAFE, a posible a panaglabsing daytoy iti Comelec Resolution No. 11116 wenno ti Anti-Discrimination and Fair Campaigning Guidelines for Purposes of the May 2025 National and Local Elections and BARMM Parliamentary Elections.
Naikkan ni Sia iti tallo nga aldaw tapno agpalawag, ken mangikalintegan no apay a di rumbeng a maipila ti kaso nga election offense wenno petition for disqualification a maibusor kenkuana.
Daytoyen ti maikapat a show cause order nga impaulog ti Comelec a maibusor iti kandidato para iti 2025 gapu iti panangisawangda iti ibilang ti Comelec a kas discriminatory remarks. (Dhel Nazario/Manila Bulletin//Lito Hilidon/Bannawag)
