Ni Dionisio S. Bulong, dati nga Editor ti Bannawag, ti agpaay a kangrunaan nga agsarita iti Dap-ayan 2025: Kombension Dagiti Mannurat nga Ilokano ti Gunglo dagiti Mannurat nga Ilokano (GUMIL Filipinas) a maangay iti Santa Teresita, Cagayan inton Abril 26-27, 2025.
Ipaay ni Bulong iti alas dies iti agsapa ti Abril 26 ti mensahena kadagiti agarup sangagasut ket limapulo a delegado a mannurat a kaaduan ti kameng ti GUMIL Filipinas ken dagiti agngayangay a mannurat nga Ilokano.
Maipagpannakkel a patanor ti Santa Teresita, Cagayan, tinurpos ni Bulong ti Journalism iti Lyceum of the Philippines (Lyceum of the Philippines University itan). Tallopulo ket siam a a tawen a nagpaay iti Bannawag--duapulo ket pito kas Editor. Autor dagiti naglatak a nobela kas iti "Fighting Pogi," "Matayakon, Rosing!" ken "Kontra Pelo." Kas pammigbig kadagiti gapuananna iti Literatura Ilokana, impaay kenkuana ti GUMIL Filipinas ti Pedro Bucaneg Award, ken ti Gawad Pambansang Alagad ni Balagtas manipud iti Unyon ng mga Manunulat sa Pilipinas (UMPIL).
Agsarita pay iti Dap-ayan 2025 ti walo nga Ilokano maipapan dagiti nadumaduma a panglakagan ni mannurat nga Ilokano mainaig iti serbi ti literatura ken kanaigna para iti pagnam-ayan ni mannurat ken ti kagimongan a paggargarawanna.
Nora Aunor, 71, pimmusay
Mainaig itoy, kadagiti mannurat nga Ilokano nga interesado a dumar-ay iti kombension, makiuman laeng kadagiti chapter president ti GUMIL Filipinas. Kadagiti mannurat iti Cagayan, makiuman ken ni Rolando A. Seguro Jr., outgoing president ti GUMIL Cagayan babaen ti mobile number 09950021291. Sangaribu a pisos (₱1,000) ti registration fee. Maibalakad kadagiti interesado nga isapsapada ti agrehistro ken agkompirmar tapno maibilang nga opisial a delegado. (Dap-ayan 2025 Secretariat)
