Bimmileg ti kandidatura ni senatorial aspirant Camille Villar iti 2025 midterm elections kalpasan ti panangyendorso kenkuana dagiti nangato nga opisial lokal ti Siudad ti Malabon bayat ti ibibisitana iti daytoy a siudad idi Marso 27.
Indauluan ni Malabon City Mayor Jeannie Sandoval ken ti kaingungotna a ni dati a Congressman Ricky Sandoval ti pannakayendorso ni Villar a kas kandidato a senador. Kakaduada a nangyendorso ken ni Villar dagiti konsehal ti siudad a da Niño Galauran, Gerry Bernardo, Maricar Torres, ken Leslie Yambao. Sipapannakkel ti grupo a nangibayog iti “C” hand sign— campaign gesture ni Camille Villar — a mangisimbolo iti panagkaykaysa a mangsuportar iti panagtaray daytoy a senador.
Ninayonan daytoy a panangipakita iti suporta manipud kadagiti lokal a lider ti dumakdakkel a gimong dagiti agpapaay iti gobierno a mangitantandudo iti kandidatura ni Villar bayat ti panagtultuloy ti panagkampaniana iti Metro Manila a pangipangpangrunaanna iti pannakilangenlangenna kadagiti gagangay nga umili ken yaasidegna kadagiti komunidad.
Dinakamat ni Mayor Sandoval ti padas ni Villar iti sektor pribado ken iti serbisio publiko a kas maysa kadagiti rason nga inyendorsona ti kandidatura daytoy. Malaksid iti daytoy, dinayaw ni Sandoval ti adbokasia ni Villar para iti pannakapataud dagiti pagtrabahuan, pannakapabileg dagiti babbai, ken pannakatarabay dagiti agtutubo—pakaseknan a nasken unay kadagiti agnaed iti Malabon.
Marcos, inkalikagumna ti disiplina iti kalsada iti baet ti yaadu ti mapagpagteng a road rage
Agpapaay ni Villar iti agdama a kas pannakabagi ti Siudad ti Las Piñas iti Kamara. Anak da Senador Cynthia Villar ken dati a Senate President Manny Villar. Naisentro ti platapormana iti ad-adda pay a pannakapadur-as ti ekonomia, dekalidad nga edukasion, ken irarang-ay nga awan koma ti maipapaigid.
Maangay ti 2025 midterm elections inton Mayo 12 a pakapilian ti 12 a senador.
