Angayen ti Unyon ng mga Manunulat sa Pilipinas (UMPIL) wenno Writers’ Union of the Philippines, kadakkelan a grupo dagiti creative writer iti pagilian, ti maika-51 a National Writers’ Congress-na inton Abril 26, 2025, Sabado, manipud 9:00 AM agingga iti 5:00 PM, iti Gimenez Gallery, University of the Philippines iti Diliman, Quezon City.
Kas paset ti selebrasion ti National Literature Month, ti tema ti National Writers’ Congress ti UMPIL ita a tawen ket “Paggigiit ng Katutubong Wika at Panitikan sa mga Karunungang Pandaigdig.”
Ti nalatak nga anthropologist ken literary researcher a ni Dr. Alicia P. Magos ti University of the Philippines-Visayas ti mangipaay iti kangrunaan a lektiur iti Kongreso. Saritaenna ti tema a naibatay iti pangitantandudo ken panangpabpabilegna iti kultura ti Panay Bukidnon.
Maitampok iti umuna a paset ti Kongreso ti dua nga UMPILAN Writers’ Fora. Mapagsasaritaan iti Forum 1 ti “Decolonial Practices” a pagpaayan da Dr. Antonette Talaue-Arogo ti De la Salle University ken Dr. Roselle Pineda iti University of the Philippines-Diliman kas panelists. Maitampok met iti Forum 2 da Dr. Alvin Yapan ti Ateneo de Manila University ken Dr. Steven Patrick Fernandez ti Mindanao State University–Iligan Institute of Technology a mangdiskas iti “Performing Cultural Resources.”
DAMDAMAG-GUMIL: Baro nga opisial ti nadumaduma a chapter ti GUMIL nga agtakem iti 2025-2027
Tampok ti Kongreso dagiti seremonia ti pammadayaw ti 2025 Gawad Pambansang Alagad ni Balagtas, maysa a lifetime achievement award para kadagiti mannurat a Filipino; ti 2025 Gawad Paz Marquez Benitez, maysa a lifetime achievement award para kadagiti mannursuro iti literatura ti Filipinas; ken ti 2025 Gawad Pedro Bucaneg, pammadayaw a maipaay iti literary-cultural group nga addaan iti dakkel a kontribusion iti panangitandudo iti literatura ken kultura ti Filipinas.
Mapadayawan iti Gawad Pambansang Alagad ni Balagtas iti 2025 da Christine S. Bellen-Ang (Literatura dagiti Ubbing iti Filipino), Isidoro M. Cruz (Literary Criticism iti Ingles), Maria L.M. Fres-Felix (Piksion iti Ingles), Jun Robles Lana (Screenplay iti Filipino), Joel B. Manuel (Piksion iti Ilokano), Marian Pastor Roces (Salaysay iti Ingles), Al Santos (Drama iti Filipino), ken Joel M. Toledo (Daniw iti Ingles).
Maipaay ti 2025 Gawad Paz Marquez Benitez ken ni Shirley O. Lua ti De la Salle University. Ti met Ing Akademyang Kapampangan Inc. ti pakaipaayan ti 2025 Gawad Pedro Bucaneg.
Ti 51st National Writers’ Congress ket suportado ti National Commission for Culture and the Arts (NCCA), ti College of Arts and Letters ti UP Diliman, ti Ignacio B. Gimenez Foundation, ti Unibersidad ti Filipinas a Prensa, ti University of the Philippines Press, ti Federation of Filipino-Chinese Chambers of Commerce and Industry, Inc. (FFCCCII), ken ti Philippine Soong Ching Ling Foundation (PSCLF). Ni nalatak a visual artist Manuel D. Baldemor ti nangdisenio ken nangidonar kadagiti maited a tropeo.
Silulukat ti maika-51 a National Writers’ Congress kadagiti amin a kameng ti UMPIL, potensial a miembro, mannursuro iti literatura, estudiante, ken enthusiasts. Para kadagiti saludsod, nasapa a panagrehistro, ken aplikasion iti panagkameng, ag-email ken ni UMPIL Secretary-General John Enrico C. Torralba iti [email protected].
