Naipaay itay nabiit ken ni diputada ken kandidato a senador Camille Villar ti suporta ti maysa a dakkel a grupo iti agrikultura, idinto nga inkarina met manen a papigsaenna babaen ti lehislatura ti suportana kadagiti sektor iti panagtalon ken panagdingo iti pagilian.
Inkannawag itay nabiit ni Rosendo So, presidente ti Samahan ng Industriya ng Agrikultura (SINAG), ti suporta ti nasao a grupo iti kandidatura iti kinasenador ni Villar, gapu iti agtultuloy nga adbokasiana para kadagiti mannalon, ken prodiuser iti panagdingo.
Kuna ni So a kankanayon ti panangsuportar ni Villar iti sektor ti agrikultura, kas kadagiti nagannak daytoy a da sigud a Presidente ti Senado Manny Villar ken agdama a Senador Cynthia Villar. Innayon ni So a no kasta a kasapulanda ti tulong, mapanda ken ni Camille ta managtulong daytoy iti nasao a sektor ken maawatanna ti kasapulan iti Kongreso ken iti Senado.
Iti panagkampaniana iti sumagmamano nga ili iti Pangasinan, impaganetget ni Villar a masapul a maipasa ti ad-adu pay a linteg tapno mapadur-as ti industria ti agrikultura. Karaman ditoy ti pannakabukel ti Livestock, Poultry, and Dairy Competitiveness Enhancement Fund, a segun kenkuana, agkurri a kas iti Rice Competitiveness Enhancement Fund.
Marcos, inkalikagumna ti disiplina iti kalsada iti baet ti yaadu ti mapagpagteng a road rage
Imbatadna ti suportana iti pannakaipasa ti Senate Bill No. 2558—ti singasing a linteg a mangpadur-as iti pannakaitag-au dagiti industria iti panagdingo, poltri, ken produksion ti gatas bayat ti pannakapapartak dagiti napateg nga akem ti gobierno. Impasa ti Senado ti nasao a gakat iti maikatlo ken maudi a pannakaibasana idi Agosto 2024, nupay maur-uray pay laeng ti kaballabagna a gakat manipud iti Kamara.
Kasta met nga intampok ni Villar ti pannakaipasa ti Republic Act 12022, ti Anti-Agricultural Economic Sabotage Law, kas napateg a nagun-od babaen ti panagserbi ti pamiliada kas agpampanday iti linteg. Babaen ti nasao a linteg, naklasipikar ti large-scale smuggling, hoarding, ken profiteering iti agrikultura kas aramid a panangsabotahe iti ekonomia.
Kuna ni Villar a no mangabak a Senador, ituloyna nga ipangruna ti pannakapanday dagiti linteg a mangbantay kadagiti mannalon ken mangpapigsa iti agrikultura.
