Iti panangdakamatna iti dakkel nga akemda iti nation-building, binigbig ni kandidato a para senador Camille Villar, idi Abril 3, ti di magatadan a kontribusion dagiti kangrunaan a masterplanner ken arkitekto ti pagilian bayat ti binulan a panagtataripnongda iti Siudad ti San Juan.
Napaliiw ni Villar no kasano a dakkel ti tulong dagiti madaydayaw nga arkitekto ken construction supplier iti ekonomia ti Filipinas bayat ti panagbitlana iti binulan a miting ti miembro ti United Architects of the Philippines (UAP) ken United Suppliers of the Philippines (USP).
“Pudno a makitami a kasapulan a papigsaen daytoy nga industria, nangnangruna tapno mapabileg dagiti propesional iti daytoy nga industria gapu ta ti positibo a kontribusionyo ket agsiwarak pay iti labes dagiti napintas ken manayon a pasdek a parnuayenyo, dagiti tinulonganyo nga imbangon,” kinunana.
“Panangpasayaat pay iti biag dagiti kailiantayo gapu ta ti trabaho nga ar-aramidenyo ket talaga a mangipaay iti ad-adu a trabaho para kadagiti Filipino ken addaan iti di magatadan a kontribusion iti ekonomia, ad-adu ngem iti masansan nga ipapaay dagiti tattao a kredito kadakayo,” innayon ni Villar, nga agkandidato para iti 2025 midterm polls.
Marcos, inkalikagumna ti disiplina iti kalsada iti baet ti yaadu ti mapagpagteng a road rage
Mairaman iti plataporma ti kampaniana ti panangpataud ti trabaho, panangitandudo iti panagnegosio, ken ti pannakapasayaat dagiti serbisio ti salun-at ken edukasion.
Binigbig ni Villar ti napateg a kontribusion dagiti organisasion iti impraestruktura ken urban development, ken sustainability initiatives, a dinakamatna a dagitoy nga aktibidad ti mangtignay met iti ekonomia ken mangipaay iti trabaho.
“Pudno a makitami ti pateg ti propesionyo. Pudno a makitami ti pateg ti industriayo. Inkeddengmi nga itandudo dagiti pakaseknan ken dagiti karbengan saan laeng a dagiti arkitekto ken inheniero no di ket amin nga adda iti industria ti konstruksion,” kinuna ni Villar.
“Kas pagaammoyo amin, maysa kadagiti pudno a mangtignay iti pagiliantayo ken maysa kadagiti kayattayo a tamingen ket ti panangipaay iti trabaho para iti adu a Filipino. Ket maysa kadagiti sumagmamano nga industria a pudno a mangipapaay iti pagbiagan ken panggedan ket ti construction, real estate industry, ken amin nga auxillary industries-na,” innayonna.
Iti bitlana, ingganetget ni Villar no kasano nga asideg unay ti negosio ti panagbangon iti pusona ta nangrugi ti amana, ti negosiante a ni Manny Villar, manipud iti panagbalinna a distributor ti graba ken darat agarup 50 a tawenen ti napalabas.
Innala met a gundaway ni Camille Villar ti nagyaman iti organisasion, nangruna ken ni Arkitekto Aldrin Derrick Chua, presidente ti USP; Arkitekto Kenneth Chua, presidente ti UAP; Arkitekto Matthew Yap, bise presidente ti UAP para kadagiti programa; ken BhingBhing Ko, GiMM Programs Chairman (MetroXchange), gapu iti panangawisda kenkuana bayat ti binulan a mitingda.
Kadua ti UAP, ti USP ket maysa nga organisasion dagiti mabigbigbig iti konstruksion, a maawagan a kas henio iti panang-redefine iti Philippine landscape.
