Kinuna ti Philippine Atmospheric, Geophysical and Astronomical Services Administration (PAGASA) iti daytoy nga aldaw, Huebes, Abril 10, a ti ‘easterlies’ wenno nabara nga angin nga aggapu iti Taaw Pasipiko ti gapuna nga agtultuloy ti kaadda ti napudot a panawen iti dandani amin a paset ti pagilian.
Kinuna ni PAGASA weather specialist Benison Estareja nga igubuay met ti easterlies ti naulep no di man medio naulep a tangatang iti sapasap a pagilian, malaksid iti akindaya a paset ti Visayas ken Mindanao.
Ngem nupay manamnama ti panagtuloy ti napudot a panawen, mabalin a mapasamak pay laeng ti maipattopattok a tudo, nangruna iti malem wenno iti sardam.
Adda 17 a lugar a mabalin a makapadas iti nakaro a kinapudot ti panawen wenno “danger” level heat index a di nababbaba ngem 42 degrees Celsius (°C) iti daytoy nga aldaw.
Marcos, inkalikagumna ti disiplina iti kalsada iti baet ti yaadu ti mapagpagteng a road rage
Pattapattaen ti PAGASA nga agsagaba ti Dagupan City, Pangasinan; Coron, Palawan; San Jose, Occidental Mindoro; and Virac, Catanduanes iti kangatuan a heat index iti daytoy nga aldaw iti kabara a 43°C.
Napattapatta met nga agsagaba iti heat index a 42°C ti Echague, Isabela; Cubi Pt., Subic Bay, Olongapo City, Pampanga; San Ildefonso, Bulacan; Cuyo, Palawan; Roxas City, Capiz; Dumangas, Iloilo; Panglao International Airport, Bohol; Catarman, Northern Samar; Dipolog, Zamboanga del Norte; Zamboanga City, Zamboanga del Sur; Musuan, Bukidnon; Cotabato City, Maguindanao; ken Butuan City, Agusan del Norte.
Maibilang a napegggad ti heat index iti nagbaetan ti 42°C ken 51°C gapu ta posible nga igubuay daytoy ti heat cramps ken heat exhaustion. No agpaut met ti pannakaisarang ti tao iti kastoy a pudot, mabalin nga agsagaba daytoy iti heatstroke. (Bannawag News Team)
