Impaganetget manen ni kandidato a para senador Camille Villar a masapul a masuportaran dagiti pamataudan iti pagbiag ken ti pannakapadur-as ti impraestruktura, bayat ti panangirugi ti Alyansa a partido ti administrasion iti panagkampaniada iti Central Luzon idiay San Jose del Monte, Bulacan a maysa kadagiti lugar nga adu ti botante.
Iti press conference ken political rally dagiti agngayangay a senador ti administrasion a pakaibilanganna idiay San Jose del Monte, kinuna ni Villar nga idi pay a supsuportaranna dagiti addang a mangpataud iti ad-adu a panggedan babaen ti pannakaidur-as ti impraestruktura wenno panagbangon kadagiti kabaruanan a pasdek a kasapulan iti panagdur-as. Innayonna a maitandudo ken matarabay koma met dagiti babassit a negosio.
“Kinapudnona, maysa kadagiti banag nga agnanayon a tuntun-oyek iti panagtrabahok iti pribado a sektor man wenno iti Kongreso—banag nga agtultuloy nga aramidek—ti panangsuporta iti panagdur-as ti ekonomia. Ket pagarupek a ti San Jose del Monte, a makita met a maysa a napintas a pagtuladan a siudad, ket pudno a nabangon babaen ti pannakasuportar dagiti pagbiagan wenno dagiti babassit a negosio,” kinunana.
Dinakamat ni Villar a kas pagarigan no kasano a, ti pannakaileppas ti MRT-7 iduronna ti panagdur-as ken mangyeg kadagiti baro a negosio, mangyeg met iti trabaho para kadagiti tattao.
Pangilinan, binabalawna ti disinformation iti viral a video ti pannanganna iti kelleb ti kaldero
“Makitatayo met nga iti kaadda ti MRT-7, mapapintas ti interconnectivity, umalisto ken lumaka ti ipapan iti sabali a lugar. Ket no adda impraestruktura a dumteng iti maysa a lugar, ngumato ti output productivity ken amadu ti pagtrabahuan ket namnamaentayo, sapay koma, ta adda met dagiti mapatakder a nalaka a ‘pabahay’ ken nasaysayaat a pagtaengan para iti amin, kadagiti kailiantayo ditoy San Jose (del Monte),” kinunana.
“Daytoy ti maysa a pammaneknek—ti panagdur-as ti maysa a siudad nga inalut-ot ti panagdur-as ti ekonomia— nga isu ti kalikagumantayo, ken ti ad-adda pay a pannakaisagana dagiti taga-San Jose del Monte para iti ad-adu ken nasaysayaat a trabaho, nasaysayaat nga impraestruktura ken napintas a housing program,” innayonna.
Agpaamianan-a-daya ken agpaabagatan a laud ti linia ti MRT-7. Mangrugi iti San Jose del Monte, Bulacan sa agpatingga iti North Triangle Common Station iti North Avenue, Quezon City.
Sakbay ti press conference ti Alyansa, naglikmut ni Villar iti North Caloocan idi Biernes ket nakilangen kadagiti aglaklako iti Bagong Silang Phase 1 Market ken iti Camarin Market.
