Iti nasurok la bassit a makabulan sakbay ti eleksion inton Mayo 2025, agtultuloy ti panangidaulo ni Senador Bong Go kadagiti kandidato a para senador, maibasar iti kaudian a surbey ti Pulse Asia a naisayangkat manipud Marso 23 agingga 29.
Iti resulta ti surbey a nairuar ita a Biernes, Abril 11, nagtalinaed ni Go a kas agsolsolo iti umuna a puesto, nga addaan iti 61.9 a porsiento a voter preference.
Ni met ACT-CIS party-list Rep. Erwin Tulfo, a dati a nakibingay iti kangatuan a puesto ken ni Go, maikadua la itan agingga iti maikatlo, nga addaan iti 51.1 a porsiento a voter preference.
Statistically tied met ni Senador Ronald “Bato” dela Rosa, nga addaan iti 48.7 a porsiento, ken ni Tulfo iti maikadua-maikatlo a ranggo.
Marcos, inkalikagumna ti disiplina iti kalsada iti baet ti yaadu ti mapagpagteng a road rage
Dagiti dadduma pay a kandidato nga addaan iti statistical chance a mangabak a senador: dati a senador Vicente “Tito” Sotto III (44.2 a porsiento, maikapat); Senador Pia Cayetano (37.5 a porsiento, maikalima agingga iti maika-10); Senador Ramon “Bong” Revilla Jr. (36.9 a porsiento, maikalima agingga iti maika-11); dati a senador Panfilo “Ping” Lacson (36 a porsiento, maikalima agingga iti maika-11);
Willie Revillame (35.7 a porsiento, maikalima agingga iti maika-12); Ben Tulfo (35.4 a porsiento, maikalima agingga iti maika-12); Makati City Mayor Marlen Abigail “Abby” Binay (35.3 a porsiento, maikalima agingga iti maika-12); Senador Manuel “Lito” Lapid (33.3 a porsiento, maikanem agingga iti maika-13); dati a senador Emmanuel “Manny” Pacquiao (32 a porsiento, maikawalo agingga iti maika-16);
Phillip Salvador (30.9 a porsiento, maika-11 agingga iti maika-17); Las Piñas City Rep. Camille Villar (29 a porsiento, maika-12 agingga iti maika-18 a puesto); dati a senador Paolo Benigno “Bam” Aquino IV (28.6 a porsiento, maika-12 agingga iti maika-18); ken ni SAGIP party-list Rep. Rodante Marcoleta (28.3 a porsiento, maika-12 agingga iti maika-18).
Naammuan met iti surbey a 38 a porsiento kadagiti rehistrado a botante ti nangilasin iti kompleto a listaan ti 12 a kandidato, idinto ta iti average, nanginagan dagiti napagsaludsodan iti 9 a kandidato, nga addaan iti median a 10.
Nagduduma bassit ti kaykayat dagiti botante kadagiti rehion ken sosio-ekonomiko a grupo, nga addaan kadagiti bilang manipud pito agingga iti 12 a nagan a napili.
Naibasar ti surbey iti rupanrupa nga interbiu kadagiti 2,400 a random a napili a nataengan a Filipino.
Addaan daytoy iti margin of error a ±2 a porsiento iti nasional a lebel, nga addaan kadagiti nangatngato a margin kadagiti espesipiko a rehion, a pakairamanan ti ±5.7 a porsiento iti National Capital Region, ±3 a porsiento iti dadduma pay a paset ti Luzon, ±4.6 a porsiento iti Visayas, ken ±4.1a porsiento iti Mindanao. (Ellalyn De Vera-Ruiz/MANILA BULLETIN)
