Inkari manen ni kandidato a Senador Camille Villar ti kinapingetna a mangidur-as iti agrikultura, edukasion, ken babassit a negosio wenno small and medium-sized enterprises (SMEs) kas ipangpangrunana iti panagpanday iti linteg, bayat ti ibibisitana iti Tagoloan, Misamis Oriental itay nabiit.
Iti sanguanan dagiti lider ken umili iti nasao a lokalidad, impaganetget ni Villar ti kinapateg ti panagpuonan kadagiti sektor a direkta a mangitag-ay kadagiti komunidad ken mangpadur-as kadagiti away.
Kuna ni Villar a dagiti nasao a sektor ti tulbek iti maysa a sapasap a panagdur-as ken agpaut a progreso. Segin iti daytoy, dagitoy dagiti tay-ak a mangapektar iti inaldaw a panagbiag dagiti Filipino, ket dagitoy ti ad-adda nga ipangrunana iti Senado.
Impeksa ni Villar ti panagyamanna iti nabara a panangpasangbay kenkuana dagiti opisial ken residente bayat ti pannakiumanna kadagitoy. Karaman iti nasao nga innuman da Misamis Oriental First District Rep. Christian Unabia, ken dagiti mayor dagiti nadumaduma a munisipalidad a pakairamanan ti Gutalac, Balingasag, Initao, Salay, Naawan, Villanueva, Claveria, Talisayan, Binuangan, Magsaysay, Kinoguitan, ken Lagonglong.
Marcos, inkalikagumna ti disiplina iti kalsada iti baet ti yaadu ti mapagpagteng a road rage
Intampok ni Villar dagiti babassit nga SMEs kas pundasion ti ekonomia ti Filipinas, gapu iti kabaelan dagitoy nga agparnuay kadagiti trabaho ken mangpapartak iti progreso iti lokalidad.
Kuna pay ni Villar a no suportaran dagiti SMEs, kaipapanan a supsuportaran met dagiti pamilia ken komunidad, ken mabangbangon ti natibtibker a masakbayan ti pagilian.
Impasigurado pay Villar iti Misamis Oriental a saan daytoy a mabati iti nailian a platapormana, ken inkarina ti agtultuloy a pannakiasmangna iti nasao a probinsia. Nagyaman iti panangibinglay dagiti lokal a lider kadagiti adbokasiada, ken impanamnamana a sadino man ti pakagtenganna, agsubli latta iti Misamis Oriental.
Paset ti nasao nga ibibisita ni Villar iti nalawlawa a kampaniana a mangimdeng kadagiti komunidad iti intero a pagilian ken mangsukog iti policy agenda a nakasentro kadagiti umili ken nakaramut iti panagpabileg, kinaandur, ken oportunidad.
